Para nisjes për në New York, ku do të përfaqësojë Kosovën në mbledhjen e Këshillit të Sigurimit të OKB-së, presidenti Thaçi tha se asgjë nuk e zhbën dot ushtrinë e Kosovës.
“Kemi 10% nga komunitetet, 5% nga komuniteti serb. Ushtria e Kosovës do të prodhojë më tepër paqe dhe stabilitet. Themelimi i ushtrisë, pavarësisht diskutimit që do të ndodhë në Këshillin e Sigurimit është proces i pakthyeshëm. Nëse Serbia është e zemëruar me formimin e ushtrisë, serbët e Kosovës janë rehat dhe komod me themelimin e ushtrisë”, tha Thaçi.
Seanca në Këshillin e Sigurimit është thirrur nga Rusia e Serbia, me pretendimin se themelimi i ushtrisë është shkelje e ligjeve ndërkombëtare e atyre vendase në Kosovës. Por Thaçi ka tjetër bindje:
“Ushtria u krijua në përputhshmëri të plotë me mandatin kushtetues ligjor. Ka qenë ditë e mrekullueshme me një votim pothuajse unanim në Kuvendin e Kosovës. Vendimi ka bashkuar gjithë njerëzit në Kosovë. Ndihem shumë mirë që Ushtria e Kosovës është themeluar pas punës dhe angazhimit të madh që e kemi pas me partnerë ndërkombëtarë”, ka deklaruar kreu i shtetit të Kosovës. /tesheshi.com/
