Ministrja teknike e Arsimit, Mirela Karabina ka zëvendësuar 4 anëtarë ekzistues të bordit në Universitetin e Mjekësisë, ndërsa ndëshkimit nuk i ka shpëtuar as Plarent Ndreca, Sekretar i Përgjithshëm i MAS.
Anëtarët e rinj të emeruar në bordin e Universitetit të Mjekësisë kanë zhvilluar sot një mbledhje, ndërkohë që një pjesë tjetër janë me pushime.
Gjithsesi kjo nuk i ka penguar 4 anëtarët e zgjedhur nga Karabina të miratojnë buxhetin, sikundër pritet të emërojnë edhe administratorin.
Tre anëtarët e zgjedhur të bordit, janë ankuar për këtë fakt te ministrja Karabina.
Një prej tyre, Bord Buba, e cilësoi mbledhjen e sotme të jashtëligjshme.
“Ne jemi me pushime dhe Karabina zëvendëson 4 anëtarë, ky është shkarkim, jo zëvendësim. Ata me këtë mbledhje cënojnë autonominë e universitetit, gjë që dëmton financat, më pas edhe zgjedhjen e administratorit. Nuk është e ligjshme kështu. Në mbledhjen e bordit, duhet të jenë 3/5 e kuorumit të bordit për të votuar. Karabina e ka bërë këtë për të prishur autonominë dhe për të marrë në dorë të gjithë financën dhe administratorin që bën punësimet,” tha Buba. /tesheshi.com/
