Shtetet e Bashkuara kanë dëbuar 35 diplomatë rusë dhe kanë mbyllur dy komplekse ruse në New York dhe Maryland në përgjigje të një fushate të ngacmimit të diplomatëve amerikanë në Moskë, tha një zyrtar i lartë i SHBA të enjten.
Ky veprim kundër diplomatëve nga ambasada ruse në Uashington dhe konsullatën në San Francisko, është pjesë e një sërë veprimesh të paralajmëruara të enjten, me qëllim të ndëshkimit të Rusisë për një fushatë të frikësimit të diplomatëve amerikanë në Moskë dhe ndërhyrjen në zgjedhjet e SHBA-ve.
Administrata Obama ka njoftuar gjithashtu të enjten për një sërë masash hakmarrëse kundër Rusisë për ndërhyrjen në institucionet politike dhe rrjedhjen e informacioneve për të ndihmuar presidentin e zgjedhur Donald Trump dhe kandidatët e tjerë republikanë, thanë dy zyrtarët e SHBA.
Diplomatët rusë do të kenë 72 orë për të lëshuar Shtetet e Bashkuara, tha zyrtari. Qasja në të dy komplekset të cilat përdoren nga zyrtarët rusë për mbledhjen e informatave, do të refuzohet për të gjithë të ngjashmit, duke filluar nga mesdita e së premtes, shtoi zyrtari i lartë i SHBA-ve.
“Këto veprime janë marrë për t’iu përgjigjur ngacmimeve ruse ndaj diplomatëve amerikanë dhe veprimeve nga ana e diplomatëve rusë për të cilat kemi vlerësuar se nuk janë në përputhje me praktikën diplomatike”, tha zyrtari.
Departamenti i Shtetit është ankuar për një kohë të gjatë se agjentët rusë të sigurisë dhe policia e trafikut kanë ngacmuar diplomatët e SHBA-ve në Moskë, dhe Sekretari Kerry e ka ngritur këtë çështje me presidentin Putin dhe ministrin e tij të jashtëm, Sergei Lavrov.
“Duke imponuar kosto për diplomatët rusë në Shtetet e Bashkuara, duke u mohuar atyre qasje në të dyja objektet, ne shpresojmë që qeveria ruse të rivlerësojë veprimet e veta, të cilat kanë penguar aftësinë dhe sigurinë e personelit të ambasadës tonë në Rusi”, ka thënë zyrtari.
Zyrtari i SHBA-ve nuk pranoi të japë emrin e diplomatëve rusë të cilët do të ndikohen, edhe pse kuptohet se ambasadori i Rusisë në Shtetet e Bashkuara, Sergei Kislyak, nuk do të jetë një nga ata që dëbohen. /tesheshi.com/
