Kryetarët e katër komunave në veri të Kosovës dhanë dorëheqje këtë të martë si përgjigje të vendimit për tarifimin 100 për qind të mallrave nga Serbia. Akti u ndërmorr pas seancës së sotme të jashtëzakonshme të Kuvendit të Komunës së Mitrovicës së Veriut.
Dorëheqjet janë dorëzuar nga kreu i Veriut Goran Rakiç, kryetari i komunës së Leposaviqit, Zoran Todiç, kryetar i komunës së Zubin Potokut. Stevan Vuloviçc dhe kryetari i komunës së Zveçanit, Vuçina Jankoviç.
Dejan Guresiç, kryetar i kuvendit komunal të komunës së Mitrovicës Veriore, u tha gazetarëve se autoritetet në veri të Kosovës nuk ekzistojnë më.
“Funksionimi i pushtetit lokal në veri të Kosovës, do të pezullohet. Autoritetet dhe organet komunale, nuk do të punojë dhe të kuvendit lokal nuk do të takohet. Ky vendim është përfundimtar dhe do të mbetet në fuqi deri në tërheqjen e plotë të të gjitha masave diskriminuese të Prishtinës”, tha Guresiç.
Goran Rakiç, kryetari i komunës së Veriut, tha se jep dorëheqjen për shkak të “represionit të vazhdueshëm institucional të kryer nga institucionet e Kosovës në Prishtinë dhe në rrezikimin e të drejtave të njeriut të popullit serb”.
Dorëheqjet u njoftuan më parë nga Shefi i Zyrës për Kosovën në qeverinë e Serbisë, Marko Gjuriç.
Në seancën e Asamblesë së Mitrovicës së Veriut, u nënshkrua një deklaratë me të cilën u kumtua fundi i çdo komunikimi me autoritetet në Prishtinë.
Tanjug raportoi se gjykata në pjesën veriore të Mitrovicës, me njësitë e gjykatës në Zubin Potok dhe Leposaviq, dhe të gjithë gjyqtarët dhe nëpunësit e këtyre gjykatave, u ndalën së punuari këtë mëngjes në ora 9, siç thanë, duke u solidarizuar me krerët politikë dhe qytetarët.
Kështu, thellohet akoma më tej kriza e shpërthyer mes Prishtinës dhe Beogradit. Fillesat qenë që me dështimin e anëtarësimit të Kosovës në Interpol, ku u fajësua Serbia me lobinin e saj frenetik për votë kundër. Më pas erdhi vendimi i qeverisë Haradinaj për tarifim 100 përqind të mallrave serbë, për t’u pasuar nga mbështetja e fuqishme e qeverisë Rama dhe qëndrimet e forta të këtij të fundit. /tesheshi.com/
