Tanimë edhe zyrtarisht, Këshilli Qendror i LSDM-së vendosi për hapat e ardhshëm të partisë duke konfirmuar kështu vendimin për të mos marrë pjesë në zgjedhjet me datë 24 prill.
Lideri i kësaj partie, Zoran Zaev tha se LSDM gjithashtu vendosi që dy ministrat, Frosina Remenski dhe Oliver Spasovski, si dhe tre zëvendësministrat, të qëndrojnë në qeveri deri në 24 shkurt, dhe e njëjta vlen edhe për deputetët e kësaj partie.
Kjo parti i jep shans deri më 24 shkurt zbatimit të Marrëveshjes së Përzhinos. Domethënë që deri me datë 24 shkurt, para shpërbërjes së Parlamentit, LSDM pret të korigjohet vendimi për caktimin e zgjedhjeve me datë 24 prill, në mënyrë që të plotësohen kërkesat për zgjedhje të drejta, demokratike dhe të rregullta nëpërmjet pastrimit në kohë të listës së zgjedhësve dhe rregullimit në kohë të mediave.
“Në qoftë se mbetet vendimi i VMRO-DPMNE dhe BDI për zgjedhje me datë 24 prill, LDSM dhe ministrat e saj do të tërhiqen dhe nuk do të marrin pjesë në zgjedhje”, tha Zaev.
“Maqedonia Demokratike insiston që Marrëveshja e Përzhinos të përmbushet plotësisht, sepse nuk ka alternativë për këtë marrëveshje. Vendimi i njëanshëm i qeverisë që të shpërndajë parlamentin më 24 shkurt dhe të shkojnë në zgjedhje më 24 prill duke mos i plotësuar paraprakisht kushtet për zgjedhje demokratike dhe të drejta e vendosën LSDM-në para dy opsioneve. T’i braktisë institucionet shtetërore apo të jep mundësinë për të korrigjuar vendimin me të cilin u caktua data e zgjedhjeve. Mbetemi të përkushtuar ta zbatojmë Marrëveshjen e Përzhinës”, deklaroi lideri i LSDM-së Zoran Zaev pas mbledhjes së Kryesisë Qendore.
Ndryshe, të dhënat e fundit nga Fondi i Shëndetësisë kanë ngjallur edhe një herë dyshimet se në Maqedoni ekzistojnë 200 deri 300 mijë vota fiktive, që mund të manipulohen nga pushteti gjatë zgjedhjeve.
Në bazë të këtyre të dhënave tregohet se në Maqedoni ka gjithsej 1 milion e 800 mijë persona të siguruar, Kjo shifër është për mbi 200 mijë më e ulët në krahasim me numrin zyrtar të popullsisë të regjistruar në vitin 2002, që është 2 milion e 65 mijë banorë. Edhe më të dyshimta bëhen shifrat nëse kemi parasysh se në regjistrin zgjedhor në Maqedoni ka 1 milion e 778 mijë votues, që është shifër përafërsisht e barabartë me numrin e personave të siguruar, që konsiderohet si një nga treguesit më objektiv të numrit real të banorëve. Nëse kemi parasysh se 427 mijë banorë janë të moshës adoleshente (pa të drejtë vote), atëherë dyshimet për votues fiktiv mund të arrijnë deri në 300 mijë.
Me një trup të tillë votuesish prej 200 mijë deri në 250 mijë, që me shumë gjasë janë votues fiktiv, në Maqedoni zgjidhen mbi 20 deputetë. /tesheshi.com/
