LSI ka publikuar më në fund qëndrimet e saj për reformën në drejtësi, drafti i së cilës është hartuar nga SHBA-BE dhe ekspertët e pavarur.
Duke deleguar deputetin Spartak Braho rrëzoi të gjithë draftin që ambasadori i SHBA-së, Donald Lu e ka cilësuar që e mbron fuqishëm.
“Ndahemi me draftin tek sistemi i karrierës. Ne duam të dominojë sistemi i karrierës, që ai të jetë thelbi i kritereve. Kemi një mendim ndryshe për mandatet, kemi një riformulim tonin mbi zgjedhjen e anëtarëve të Gjykatës Kushtetuese, sipas modelit gjerman. Kemi një opsion tjetër për organizimin e Gjykatës së Lartë, duke gjykuar që ajo duhet të jetë një dhe e vetme e ndarë sipas seksioneve. Kemi një gjykim tjetër lidhur me organizimin e Prokurorisë duke e parë atë si një organ të unifikuar me të drejtën dhe mundësinë që të funksionojnë pranë saj struktura të posaçme antikorrupsion. Jemi për një rol më aktiv apo për formulime që rrisin rolin aktiv të ministrit të Drejtësisë”, tha Braho.
Sipas LSI-së, drafti është i ngarkuar me ndryshime të shumta të Kushtetutës, që deputeti Braho tha se mund të shmangen përmes ligjeve. Një tjetër rezervë e LSI-së është edhe numri i madh i institucioneve që krijohen.
Braho tha gjithashtu se reforma duhet të miratohet me PD-në. “Të vazhdojmë dialogun dhe dialogu politik dhe profesional bëhet këtu në tavolinë. Ritheksoj edhe njëherë këtë kërkesë dhe nuk kam arsye pse të mos e përshëndes ardhjen e përfaqësuesve të opozitës këtu”, u shpreh deputeti i LSI-së.
/tesheshi.com/
