Nga Blendi Gashi
Presidenti Thaçi me iniciativën e marrë për themelimin e ushtrisë përmes ndryshimit të ligjit për FSK-në ka befasuar jo veç opozitarët por edhe partnerin qeverisës LDK-në, drejtues të cilës janë shprehur se formimi i ushtrisë duhet të bëhet në pajtim me ndërkombëtarët.
Por sigurisht më i befasuari nga zyrtarët e LDK-së është shefi i grupit parlamentar, Ismet Beqiri, i cili në seancën e 14 shkurtit kur ligjvënësit debatonin për themelimin e ushtrisë, tha se do votojë kundër nëse tentohet që ushtria të themelohet pa mbështetjen ndërkombëtare.
“Asnjë votë timen nuk do të merr asnjë propozim që nuk e ka mbështetjen e NATO-s dhe Amerikës. Gjërat duhet të ua themi qytetarëve atë që po na thonë nëpër takime”, deklaroi ai.
Por, Beqiri sot në një deklarim për media pas mbledhjes së kryesisë së Kuvendit, nuk bëri të ditur nëse ai personalisht do japë votën pro, ndërsa tha se LDK-ja është për transformim të FSK-së.
“Si LDK ne jemi që të përkrahet ky projektligj, duke besuar thellë për përkrahjen e partnerëve strategjik”, deklaroi Beqiri.
Ndërsa Thaçi, në konferencën që zhvilloi dje me kryekuvendarin Veseli ku i dorëzoi projektligjin për ushtrinë, nuk tregoi nëse iniciativa e tij ka përkrahje ndërkombëtare, duke kërkuar votat e deputetëve për formimin e ushtrisë.
Kështu Thaçi përveç që la jashtë loje LDK-në në të njëjtën kohë këtë parti e ka vënë para aktit të kryer, të japë votën pro apo të akuzohet si parti që nuk e dëshiron themelimin e ushtrisë.
Se iniciativa e Thaçit nuk është pritur mirë e tregon edhe heshtja e kryeministrit Mustafa, i cili nuk e ka thënë asnjë fjalë konkrete (përjashto deklarimin e bërë në Facebook ku mbron ministrin Haki Demolli ku thotë se nuk është kundër ushtrisë), pasi tashmë është i detyruar të dalë kundër ndërkombëtarëve dhe në anën e Thaçit.
Por ja ç’thonë deputetët e LDK-së …
Anton Quni, deputet i LDK-së, pa dashur të japë përgjigje nëse është anashkaluar apo jo partia e tij, thotë se janë të njohura pengesat që deputetët serb të ndikuar nga Beogradi i paraqesin kundrejt transformimit të FSK-së në FAK.
Quni thotë se në frymën e rezolutës së parlamentit në lidhje me transformimin e FSK-së në FAK,është obligim i të gjitha institucioneve relevante të gjejnë rrugë kushtetuese dhe ligjore gjithnjë në bashkërendim me SHBA dhe NATO, ashtu që FSK-ja të mandatohet edhe me mision ushtarak të karakterit mbrojtës.
Ai uron që nisma e presidentit Thaçi të jetë e sinqertë gjithashtu e bazuar në nevojat e kohës dhe të jetë e pakontestuar nga partnerët strategjik.
“Si deputet dhe antar i Komisionit të Sigurisë, gjatë procedimit të ligjit, do të jap komente që e ndihmojn procesin e transformimit. Gjithsesi edhe me ndihmën dhe ekspertizën në fushën e së drejtës kushtetuese, ligjore dhe ushtarake do të mundohemi që të sqarojm të gjitha dilemat e ngritura në lidhje me emërtimin, misionin, financimin, afatet etj. Është me rëndësi të kuptohet nga qytetarët serb të Kosovës, nga shtetet fqinje dhe nga skeptikët brenda komunitetit ndërkombëtar, se ushtria e Kosovës do të jetë garantuese e paqes dhe në shërbim të të gjithë qytetarëve, që aspiron në të ardhmen e afërt të jetë pjesë e Partneritetit për Paqe”, deklaron Quni, për tesheshi. com.
Adem Salihaj, deputet i LDK-së, thotë se ideja për ta shndërruar FSK-në në ushtri nuk është e Thaçit, por një ide e vjetër, të cilën e kishin shumë të tjerë para tij.
Salihaj thotë se bashkëpartiaku i tij, ministri Haki Demolli dhe FSK-ja e kanë përgatitur projektligjin për shndërrimin e FSK-së në ushtri, dhe Thaçi vetëm vrapon për t’i marrë meritat e të tjerëve dhe për t’u dukur patrioti.
“Në fakt ai ka pasë tentuar për ta ndryshuar kushtetutën dhe per ta formuar ushtrinë duke u dhënë serbëve koncesione të mëdha,sa që do të mund ta dëmtonin tepër shumë Kosovën. Tash problemi nuk është te kushtetuta, por te ndërkombëtarët,të cilët po insistojnë që të ndryshohet kushtetuta. Kushtetuta e njeh FSK-në si forcë mbrojtëse,nuk e thotë që është nuk apo është ushtri. Pra,sipas kushtetutës, formalisht nuk ka pengesa për ta shndërruar FSK-në në ushtri”, thotë Salihaj, për tesheshi. com.
I pyetur se si do të votojë në momentin që dërgohet në Kuvend për ndryshimin e këtij ligji, Salihaj nuk jep një përgjigje të prerë.
“Tash për tash nuk mund t’i parashikoj rrjedhat dhe votën. Por, gjithësesi jam në favor të krijimit të ushtrisë”, ka deklaruar Salihaj.
Arben Gashi, deputet tjetër i LDK-së, veprimin e Thaçit, e quan më shumë të dëmshme se sa të shëndetshëm dhe potencialisht të rrezikshëm për të ardhmen e FSK-së.
“Iniciativa për shndërrimin e FSK-së nuk duhet të ishte ardh prej presidentit, këtë rol është dashur të bëjë qeveria. Kjo nismë mundet të bëjë probleme ngase mundet të keqpërdoret për çështje personale dhe në të ardhmen të përdoret për ndojë puç ushtarak. Është gabim të mendohet se Kosova mundet të nderoj Ushtrinë pa partner strategjik, sikur është SHBA, NATO dhe Bashkimi Europian”, ka deklaruar Gashi. /tesheshi.com/
