Presidenti Thaçi njoftoi një takim me homologun serb Vuçiç në Uashington, ku ndërmjetës ka qenë i dërguari Grenell
“Sapo përfundova një takim të përbashkët me Presidentin e Serbisë, Aleksandër Vuçiq, në Shtëpinë e Bardhë, me ftesë të emisarit special për dialogun ndërmjet Kosovës dhe Serbisë, Richard Grenell, ku i pranishëm ishte edhe Këshilltari për Siguri Kombëtare, Robert O’Brien”, shkruan Thaçi, i cili më pas vlerëson mbështetjen amerikane për Kosovën.
“Kosova është e bekuar me mbështetjen e Amerikës dhe Presidentit Trump.
Tani jam rrugës për në Kosovë. Pres që menjëherë, të mërkurën apo të enjten, të më mundësohet raportimi në Kuvendin e Republikës së Kosovës, për t’i njoftuar deputetët dhe qytetarët e Kosovës për takimet në Uashington dhe më specifikisht për takimin e sotëm.
Duke qëndruar të bashkuara institucionet, partitë politike dhe qytetarët, Kosova do të jetë edhe më e fortë.
SHBA është shpresa dhe besimi ynë. Jemi mirënjohës përjetë!”, shkruan Thaçi.
Më pas, në një prononcim për median e Prishtinës, ai e vlerëoi takimin pikërisht në kuadër të mbështetjes amerikane.
“E rëndësishme është që ka ndodhur takimi në Uashington aty ku qytetarët e Kosovës e kanë shpresën, besimin dhe optimizmin e sotëm, por edhe për të ardhmen e tyre euro-atlantike tek partneri ynë i përjetshëm dhe strategjik i raporteve speciale mes Kosovës dhe SHBA-së, aty ku besimi i Kosovës është i plotë.
Dua të potencoj se kjo do të rritë edhe më tepër besimin institucional, ndërpartiak, por edhe atë qytetar për procesin që po kalojmë në mundësinë e arritjes së marrëveshjes përfundimtare mes Kosovës dhe Serbisë që do të nënkuptonte njohjen reciproke”, komentoi Thaçi. /tesheshi.com/
