Hashim Thaçi dhe Aleksander Vuçiç në takimin e zhvilluar sot në Bruksel kanë rënë dakort që të shpeshtohen ontaktet me qëllim arritjen e një marrëveshjeje midis dy shteteve.
Presidenti kosovar pas takimit tha se faza e re e dialogut është e rëndësishme që të fillojë sa më shpejtë që të jetë e mundur pa dhënë ndonjë datë.
“Falënderoj Mogherinin që na mundësoi këtë takim me presidentin e Serbisë për normalizimin e marrëdhënieve. Ka qenë një takim korrekt ku kemi diskutuar për hapat e mëtejshëm për fillimin e një dialogu të ri në mes Kosovës dhe Serbisë për normalizimin e marrëdhënieve fqinje. Kosova edhe Serbia kanë nevojë për një marrëveshje përfundimtare dhe shpresoj që në të ardhme ta arijmë një marrëveshje të tillë”, tha Thaçi.
Në vijim ai shtoi se kjo fazë e re e dialogut që e kemi deklaruar edhe më herët është e nevojshme që të fillojë sa më shpejt që është e mundur dhe të jetë e kritereve evropiane.
“Në këtë fazë kemi besim të plotë që kjo marrëveshje do të jetë një unitet i qëndrueshëm, në unitet me Bashkimin Evropian dhe mbështetjen e plotë të Shteteve të Bashkuara të Amerikës”, shtoi ai.
Por për të filluar kjo fazë e re e dialogut, Thaçi tha se nevojitet që të krijohen institucionet e reja të Kosovës, për të cilat presidenti uron që të formohen sa më shpejtë.
Ai gjithashtu ka treguar se do të diskutohet për çështjet të cilat kanë mbetur të hapura dhe të cilat kanë nevojë të mbyllen njëherë e përgjithmonë.
“Çdo marrëveshje përfundimtare midis dy vendeve do të jetë në pajtim me vullnetin e popullit të Kosovës”, tha Thaçi.
Ndërsa, presidenti serb Vuçiç ka deklaruar se sot janë hapur bisedimet për marrëdhëniet afatgjata ndërmjet serbëve dhe shqiptarëve.
Ai theksoi se zgjidhja historike e marrëdhënieve ndërmjet serbëve dhe shqiptarëve do të thoshte shumë edhe për Beogradin edhe për Prishtinën, kështu që këso bisedimesh do të vazhdojnë, edhe pse, tha ai, nuk është optimist i madh.
“Shoh mundësi të vogël në zgjidhjen e çështjeve ndërmjet serbëve dhe shqiptarëve dhe duhet t’i shfrytëzojmë. Ia vlen të provohet për shkak të së ardhmes”, ka thënë Vuçiç.
Kujtojmë se Kosova dhe Serbia kanë arritur marrëveshjen e parë për normalizimin e marrëdhënieve në prill të vitit 2013, që është kusht për të dyja vendet që të avancojnë në rrugën e integrimit evropian. /tesheshi.com/
