Në një intervistë për Reuter-s, presidenti Thaçi mbrojti qëndrimin e tij të cilin po e promovon fort, atë që e konsideron korrigjim kufijsh.
“Definitivisht tani është momenti për të korrigjuar kufirin midis Kosovës dhe Serbisë, që është rreth 400 kilometra. Kjo do të ndihmonte në shmangien e problemeve ndëretnike dhe krijimin e çfarëdo rajoni autonom si Republika Srpska (në Bosnjë)”, tha Thaçi, sipas së cilit kjo nuk mund të përkthehet si ndarje e Kosovës, por e kundërta.
“Korrigjimi i kufijve definitivisht do të shmangë ndarjen e Kosovës, duke shkëmbyer territore, më shumë krizë apo probleme ose ndoshta edhe një luftë të re”, theksoi Thaçi.
Presidenti kosovar vijon të shmangë një përgjigje të qartë mbi fatin e Veriut të Kosovës, atje ku jeton një përqindje e madhe serbësh, porsi Lugina shqiptare në Serbi, për të cilën e thotë qartë se duhet t’i bashkohet Kosovës.
Thaçi bëri me dije se pas disa javësh do ia paraqesë homologut të tij Vuçiç, projektin e tij mbi korrigjimin e kufijve. Dhe aty pritet të mësohet se ç’fat do të ketë Veriu i Kosovës. /tesheshi.com/
