Pak kohë pas marrjes së Presidencës, por dhe një vale të bujshme arrestimesh dhe ndalimesh në radhët e opozitës kosovare, dhe sidomos Vetëvendojes, Hashim Thaçi ka lëshuar një mesazh të pazakontë duke thënë se do të iniciojë hartimin e një kodi që nuk do të lejojë njerëz të dënuar në skenën politike.
Deklarata e tij u bë gjatë një takimi me një delegacion të deputetëve të Parlamentit Evropian.
Tashmë do të duket të sqarohet nëse ky qëndrim i referohet pikërisht reagimeve policore ndaj deputetëve dhe figurave të opozitës përgjatë muajve të krizës dhe incidenteve më gaz lotsjelljës në sallën e Kuvendit, apo atyre emrave të mundshëm që pritet t’i nënshtrohen Speciales.
Më tej, Thaçi ka thënë se vizita e europarlamentarëve është hap i ri dhe hapje e një kapitulli evropian për Kosovën.
“Mund të themi se muajt e parë të këtij viti kanë qenë evropian për Kosovën, falënderoj eurodeputetët për mbështetjen që i kanë dhënë Kosovës. Do t’i kryejmë të gjitha obligimet tona që liberalizimi të bëhet sa më shpejt dhe qytetarët të lëvizin lirshëm”, ka thënë Thaçi.
Tutje, ai ka thënë se do të punojnë edhe për implementimin e marrëveshjes për Demarkacionin me Malin e Zi. /tesheshi.com/
