Presidenti Thaçi i ka bërë sërish thirrje partive politike të bëhen pjesë e dialogut me Serbinë duke thënë se arritja e një konsensusi të përgjithshëm do ta forconte ekipin e palës kosovare.
“Ato (partitë) duhet të japin vërejtjet e kontributin dhe patriotizmin e tyre për këtë proces”, tha Thaçi gjatë raportimit para kabinetit qeveritar për takimin e fundit me Vuçiçin.
Ai më tej tha se kjo fazë e dialogut do të jetë transparent dhe llogaridhënies para institucioneve dhe qytetarëve.
“Kuvendi i Kosovës duhet të përfshihet drejtpërdrejt pasi nëse do të ketë një marrëveshje ajo duhet të ratifikohet në Kuvend më 2/3 e votave”, tha ai.
Thaçi tha se në takimin e së dielës ju ka bërë të ditura palëve se Kosova nuk do të bëjë kompromise tjera që dalin jashtë Pakos së Ahtisarit.
“Në takimin me Mogherinin si delegacion i Kosovës, kemi bërë të qartë se jemi të interesuar që të arrijë një marrëveshje përfundimtare obliguese me Serbinë dhe ky proces të përmbyllet me njohje reciproke. Marrëveshja përfundimtare nga Serbia ka dimension të gjerë, pasi mundëson që Kosova të bëhet anëtare e OKB-së dhe njohja nga pesë vendet e BE-së që nuk e kanë njohur”, u shpreh Thaçi.
Presidenti tha se ky proces mbështetët fuqishëm edhe nga SHBA-të që sipas tij edhe në këtë takim kanë pasur përfaqësuesin e vet.
Ai ka njoftuar se gjatë javës së ardhshme pret që së bashku me kryeministrin, kryeparlamentarin, partitë politike, shoqërinë civile, të ulën të formojnë ekipin dhe të përgatiten për formimin e ekipit negociator. /tesheshi.com/
