Presidenti Thaçi shprehu pakënaqësi nga fakti se i vetmi që s’ju përgjigj një ftese të tij për takim në kuadër të një diskutimi me aktorë politikë në lidhje me sfidat aktuale të Kosovës, ishte Albin Kurti, kreu i VV-së dhe njëherësh kryeministër.
“Me Kryeministrin Albin Kurti, edhe pse takimi ka qenë i konfirmuar për sot në ora 13:00, por për fat të keq pesë minuta para orës 13:00 është anuluar nga zyra e Kurtit”.
Kosova nuk ka kohë për të humbur për teket e askujt. Kur kemi qenë të bashkuar kemi pasur suksese dhe besoj se do të kemi sukses edhe tani”, tha Thaçi në një konferencë për shtyp, pas një sërë takimesh, ku u veçuar ai me Haradinajn, Mustafën, Limajn e Veselin.
“Synimi im si President i vendit ka qenë që të diskutojmë me liderët institucionalë dhe politikë për momentin aktual politik që po kalojmë dhe hapat që do t’i ndërmarrim në të ardhmen e afërt pas takimit në Shtëpinë e Bardhë në Uashington mes meje dhe Presidentit serb Aleksandër Vuçiç të organizuar nga ambasadori i Shteteve të Bashkuara në Gjermani Richard Grenell”, qartësoi Thaçi.
E si për të lënë të nënkuptuar se pas tij qëndrojnë SHBA, Thaçi vuri në dukje se “takimet u zhvilluan edhe me prezencën e Këshilltarit amerikan për Siguri Kombëtare Robert O’brien si dhe me mbështetjen e plotë të Matheë Palmer dhe me direktiva specifike për këtë proces të udhëhequr drejtpërdrejt nga Presidenti Donald Trump”.
“Kosova çdoherë ka kërkuar që në tavolinën ku diskutohet për të sotmen dhe të ardhmen e Kosovës dhe Ballkanit Perëndimor të jenë Shtetet e Bashkuara.
Tash kemi rol udhëheqës që e rritë optimizmin dhe besimin e plotë të qytetarëve të vendit, institucioneve dhe gjithë politikës kosovare”, theksoi kreu i shtetit të Kosovës. /tesheshi.com/
