Presidenti Thaçi priti këshilltarët diplomatikë të presidentit të Francës Emmanuel Macron dhe të kancelares së Gjermanisë Angela Merkel, të cilët ishin për vizitë në Kosovë.
Sipas njoftimit nga presidenca, Thaçi u përcolli atyre mirënjohje ndaj angazhimit të Francës dhe Gjermanisë për përpjekjet e dialogut, por megjithatë këmbënguli për bisedime pa kushtëzime dhe vazhdim të tarifave shtesë për Serbinë.
Thaçi u kujdes që të përcillte mesazhin se “Kosova nuk do të pranojë kritere tjera për liberalizimin e vizave, sidomos jo në formë të kërkesave për tarifat apo asociacionin”.
Ai kërkoi që qytetarët e Kosovës të mos mbahen të izoluar padrejtësisht dhe të mos trajtohen si qytetarë të dorës së dytë.
Deklaratat e tij vijnë pak ditë pas atyre “me spec”, kur tha se Kosova po trajtohej padrejtësisht nga Evropa, dhe akuzoi këtë të fundit për izolimin e vendit.
Madje ai ka deklaruar se duhet rishikuar vullneti i popullit të Kosovës dhe Shqipërisë dhe të merret në konsideratë nëse duhet bashkuar dy shtetet.
Një retorikë e tillë megjithatë është kritikuar nga qarqet europiane, duke u quajtur si “e rrezikshme dhe populiste”. /tesheshi.com/
