Presidenti Thaçi ka takuar në Dallas gjatë ditëve të tij amerikane, ish-presidentin George W. Bush.
Nën ethe gëzimi për këtë takim, presidenti kosovar ka nxituar të ndajë me publikun atë se ç’ka biseduar me ish-kreun e Shtëpisë së Bardhë dhe se ç’kompliment ka marrë prej tij.
“Bashkë evokuam shumë kujtime nga e kaluara jo e largët, mirëpo fokusi ynë ishte tek përpjekjet e tashme të shtetit tonë për të siguruar një të ardhme të sigurt dhe në paqe.
Në kontekst të këtyre përpjekjeve, u pajtuam se është e domosdoshme arritja e marrëveshjes përfundimtare obliguese ndërmjet Kosovës dhe Serbisë, e cila do të shënonte mbylljen e konfliktit njëshekullor, njohjen reciproke dhe anëtarësimin e Kosovës në OKB, NATO dhe BE.
Sigurisht se arritja e kësaj marrëveshjeje nuk është aspak e lehtë. Por, presidenti Bush më dha një këshillë të çmuar, të cilën dua ta ndaj me ju.
‘Ju si liderë nuk do të mbaheni në mend për vendimet populiste, por për vendimet e vështira dhe të drejta që merrni për vendin dhe popullin tuaj’”, shkruan Thaçi në rrjete.
Më pas ka bërë me dije se e ka dekoruar ish-presidentin amerikane me Urdhrin e Pavarësisë, për kontributin e tij për lirinë dhe pavarësinë e Kosovës. /tesheshi.com/
