Ditë pasi përcolli mesazhe të nënkuptuara “pa emër”, e që me emër e ftoi në takim por u refuzua, presidenti Thaçi ka reaguar ashpër, me emër e mbiemër, ndaj Albin Kurtit.
“PËRPËLITJET E KURTIT
I frustruar, vazhdon gënjeshtrat dhe mashtrimet.
Frikacak dhe djallëzor, po përçan politikën dhe institucionet e Kosovës.
Përqesh dhe saboton shtetin.
Nuk ka guxim as ta heq taksën, as të vërë reciprocitetin.
I padinjitet.
Po angazhohet për shkatërrimin e aleancave historike.
Me paranojë flet për marrëveshje sekrete Kosovë-Serbi.
Qesharake për Kosovën.
Fyese dhe e rrezikshme për raportin e Kosovës me SHBA-në”, shkruan Thaçi në një të fundit mesazh plot nervozitet.
Më tej ai kujton se Kurti ka, sipas tij, dhe kusure nga e kaluara në raport me SHBA.
“Rikujtoj:
Këtë qëndrim KUNDËR, Kurti e ka mbjellë në kohën e Konferencës së Rambujesë.
Ishte kundër administratës Klinton.
Edhe në Vjenë, kundër administratës Bush.
Edhe me demarkacionin me Malin e Zi kundër administratës Obama-Biden.
Edhe tash kur ofrohet një mundësi nga administrata e Presidentit Trump për njohje reciproke, Kurti përsëri kundër.
E vetmja konstante e Kurtit është të qenit në anën e kundërt të Amerikës.
Në anën e kundërt të historisë.
Populli i Kosovës ka besim në Shtetet e Bashkuara të Amerikës.
Aleanca me SHBA-në është e shenjtë.
Ne të gjithë e kemi për detyrë ta mbrojmë”, shkruan i pari i shtetit të Kosovës.
Ky reagim vjen dhe nga fakti i një nervozizmi të Uashingtonit me Kurtin, i cili nuk pranon të heqë taksën plotësisht, duke zgjedhur ta heqë pjesërisht. /tesheshi.com/
