Presidenti Thaçi ka përdorur një shprehje jashtë kontureve të gjuhës zyrtare, teksa ka komentuar qëndrimet e Haradinajt e Veselit karshi tij, sa i përket çështjes së kufijve. Më shumë se me Veselin, llogaritë i ka patur me Haradinajn, kundërshtarin e flaktë të korrigjimit të kufijve, i cili nuk ia përtoi t’i rrëzojë idenë e lëvizjes së kufijve edhe një ditë më parë kur ishin krah njëri-tjetrit, gjatë një ceremonie përkujtimore.
Dhe Thaçi zgjodhi të reagonte me gjysmëironi, për ta ripotencuar më pas vlerën historike sipas tij, të korrigjimit të kufijve.
“S’dëshiroj t’i komentoj asnjë deklaratë të liderëve. Bashkëpunimi me Veselin dhe Haradinajn është shumë i mirë. Bashkëpunoj me të gjitha partitë, respektoj çdo lider dhe as nuk pretendoj të ndikoj apo as s’lejoj të më kapë për hunde dikush apo unë dikë. Bashkëpunimi ekziston maksimalisht me opozitë e pozitë. As s’pretendoj të kem influencë. Vetëm bashkëpunimi hap rrugë për të ardhmen. Ajo që duhet të bëjmë është se kjo fazë përpos patriotizmit të paraqitur në akademi përkujtimore kërkon mençuri, shkathtësi, largpamësi dhe përgjegjësi shtetërore. Par paraqitja në akademi dallon nga përfaqësimi i Kosovës në tavolinë përballë Serbisë”, ka thënë Thaçi gjatë një conference për shtyp në orët e pasdites, duke theksuar se “marrëveshja paqësore Kosovë -Serbi i hap vendit rrugë të sigurt për anëtarësim në BE, NATO dhe OKB. Prandaj s’ka arsye të kemi hezitim nga ky proces.
Parlamenti evropian do të mirëpres marrëveshjen eventuale mes dy shteteve që nënkupton njohjen reciproke, që të jetë obligueshme ligjërisht në rrafshin ndërkombëtarë për t’i hapur rrugë Kosovës për anëtarësim në organizata të mëdha.
Në asnjë rrethanë nuk do të ketë kufij etnikë. Do të ketë korrigjim të kufijve dhe bashkim të Luginës me Kosovën”, theksoi Thaçi. /tesheshi.com/
