Presidenti Thaçi e takoi të dërguarin e BE-së për dialogun, Miroslav Lajçak, duke mos iu përmbajtur përbetimit për të kundërtën. Madje vlerësoi rolin e tij për rikthimin në tryezë të Prishtinës e Beogradit, ku njëherësh kërkoi liberalizimin e vizave për Kosovën.
“Diskutuam për angazhimet e drejtpërdrejta të Lajçak në negociatat Kosovë-Serbi. Çdo përpjekje që çon në normalizim të marrëdhënieve është e mirëseardhur. Dua të besoj se do të kemi veprime konkrete dobiprurëse për dy vendet dhe popujt tanë. Kosova ka impelmentuar shumë kritere dhe standarde. Ky proces duhet të fillojë me liberalizim të vizave dhe të mbyllet sa më shpejt që është e mundur me njohje reciproke”, tha Thaçi.
Nga ana tjetër, Lajçak kërkoi që dialogu të vijonte në Bruksel, atje dhe ku u iniciua.
“BE është shumë serioze kur bëhet fjalë për këtë proces dhe mandati im është që të ndihmojë dhe të arrihet një marrëveshje legalisht e obligueshme në mes Kosovës dhe Serbisë, që do të rregullonte të gjitha marrëdhëniet në mes këtyre dy vendeve e që do të ishte e pranueshme për të dy këto vende dhe vendet e tjera përreth.
Prandaj unë pres që këtë proces të përcjellim me sukses dhe të sjelljes ashtu siç ka filluar nga viti 2011”, tha njeriu i Brukselit gjatë vizitës së parë në Prishtinë. /tesheshi.com/
