Presidenti Thaçi nuk e ka përmendur më korrigjimin e kufijve, tezën e tij të promovuar ç’prej kohës, por jo dhe “lëndën” e kësaj teze, kalimin e Luginës së Preshevës në hapësirën shtetërore të Kosovës.
Pas një takimi në Tiranë me kryeministrin Rama, Thaçi shkroi në FB:
“Sapo zhvillova një takim me kryeministrin e Republikës së Shqipërisë, Edi Rama, ku mes tjerash biseduam për domosdoshmërinë e hapjes së plotë të kufirit Kosovë-Shqipëri dhe krijimin e një hapësire shqiptare pa kufi, nën ombrellën euroatlantike. Në këtë takim ngritëm nevojën e korrigjimit të padrejtësive historike, duke bashkuar faktorin shqiptar rreth sensibilizimit të së drejtës të bashkëngjitjes së Preshevës, Medvegjës dhe Bujanocit me territorin e Republikës së Kosovës”, shkruan Thaçi.
Thaçi është në Tiranë për një samit rajonal, aty ku pritet të jetë prezent dhe Vuçiç. Më parë ai takoi dhe homologun Meta.
Në mesazhin e mësipërm, vihet re pra mospërmendja e korrigjimit të kufijve, por vetëm arsyeja se pse duhen korrigjuar sipas Thaçit. /tesheshi.com/
