Presidenti Hashim Thaçi, gjatë adresimit të tij para ushtarëve të Forcës së Sigurisë së Kosovës ka rikthyer akuza ndaj Bashkimit Evropian.
Duke folur për themelimin e Gjykatës Speciale,ai tha se e njëjta iu imponua institucioneve kosovare por jo atyre në Beograd edhe pse e kanë merituar.
“BE e ka imponu themelimin e saj, institucionet tona e kanë pranu një gjë të tillë.Mendoj se Specialja nuk do të arrij të bëj atë që proklamon. Sikur të kishte drejtësi të tillë 100 gjykata të këtilla do të duhej të bëheshin kundër Serbisë që janë kry në Kosovë e Ballkan”, tha Thaçi.
Ai ka folur edhe për mosliberalizimin e vizave, me ç’rast ka deklaruar se BE-ja duhet t’i japë fund izolimit të qytetarëve.
“Kosova, si vendi më proevropian në Ballkan, është shteti më i izoluar në Evropë, e në anën tjetër evropianët e rinj sot janë evropianë të izoluar. Pse Kosova trajtohet kështu, kur dihet se Bashkimi Evropian, ka qenë pjesë e ndërtimit të demokracisë në Kosovë, në vitet 1999-2008, dhe më pas, kur BE ka qenë pjesë në procesin e shtet-ndërtimit të Kosovës? Politikanë dhe diplomatë, policë, prokurorë dhe gjykatës, ekspertë të gjitha fushave të BE-së dhe të shteteve anëtare të BE-së, janë pjesë e pandashme e sukseseve tona.Gjithsesi, ata janë edhe pjesë e gabimeve dhe dështimeve tona. Nuk ka integrim evropian pa tejkalimin e izolimit diskriminues të imponuar e të stërzgjatur.Më lejoni të jem i qartë, ne e dimë se Kosova nuk do të jetë e gatshme për t’iu bashkuar BE-së vitin e ardhshëm. Sidoqoftë, besoj të gjithë jemi të vetëdijshëm dhe të shqetësuar nga fakti se procesi është i padrejtë”, ka thënë ai.
Thaçi, para pjesëtarëve të FSK-së ka folur edhe për formimin e ushtrisë me ç’rast ka thënë se Kosova duhet të përfundojë tranzicionin e FSK-së dhe të themelojë ushtrinë shumetnike, pra Forcat e Armatosura të Kosovës.
“Këtë jemi duke e bërë në koordinim të plotë me NATO-n dhe partnerët tanë”, ka deklaruar Thaçi pa dhënë një afat se kur mund të ndodhë. /tesheshi.com/
