Presidenti Hashim Thaçi nuk ka dhënë një përgjigje të prerë se çfarë do të bëhet me Demarkacionin kur është pyetur sot nga mediat pas takimit që zhvilloi me Haradinajn.
Ai tha se prioritetet janë të përbashkëta për të gjitha institucionet dhe është e rëndësishme që liberalizimi të ndodh sa më shpejt që të jetë e mundur.
“Të gjithë jemi të përkushtuar që të kemi liberalizim të vizave sa më shpejt, ndaj edhe do të ndihmojmë njëri-tjetri. Besoj se do të kemi mbështetjen e qytetarëve dhe shoqërisë civile, por edhe të opozitës. Ne nuk jemi këtu që të komentojmë deklaratat e njëri-tjetrit. Nuk mendoj se asnjë projekt asnjë iniciativë duhet të lidhet me këtë apo atë person. Ne duhet që të gjitha energjitë t´I përqëndrojnë në aktivitete të përbashkëta. Fokusimi ynë është që të çojmë sa më shpejt proceset përpara. Përgjegjësitë tona janë të ndara, por prioritetet janë të përbashkëta që të lëvizim sa më shpejt përpara”, tha ai.
Thaçi më tej shtoi se raporti i Kosovës me Malin e Zi është i fqinjësisë së mirë dhe nuk ka marrëdhënie të prishura mes të dy shteteve. “Kemi raporte të shkëlqyera”, tha ai.
Kurse Haradinaj nuk foli për këtë temë, ndonëse ditë më parë kreu i ekzekutivit në mbledhjen e parë ka shkarkuar kryetarin e Komisionit për shënjimin e kufizimit me Malin e Zi Murat, Mehën, në vend të tij e emëroi ish-deputetin e LDK-së, profesorin e gjeografisë, Shpejtim Bulliqin. /tesheshi.com/
