Kryeministri i Kosovës, Isa Mustafa, akuzoi Presidentin Hashim Thaçi mbi formën që ai zgjodhi për të komunikuar me qeverinë duke përdorur rrjetet sociale dhe jo aktet zyrtare.
Thaçi përmes një postimi në Facebook apeloi që Kosova të ndihmojë me 100 mijë dollarë familjet e prekura nga përmbytjet në Houston.
Por i menjëhershëm ka qenë reagimi i kryeministrit Mustafa, i cili po përmes rrjeteve sociale, ka shprehur kritika mbi mënyrën se si Presidenti ka zgjedhur të bëjë propozimin.
“Si Kryeministër e kam konsideruar të dhimbshme dhe serioze fatin e viktimave dhe mbi një milion njerëzve të zhvendosur nga përmbytjet në Houston. Për këto çështje presidentët nuk komunikojnë me qeverinë me facebook, por me akte zyrtare dhe duke respektuar legjimitetin e saj”, ka shkruar Mustafa.
Presidenti Hashim Thaçi i ka kërkuar, sot, Isa Mustafës të ndajë 100 mijë dollarë për t’i dërguar në Houston pas uraganit Harvey, ku ka pasur dhjetëra viktima dhe shkatërrime të mëdha.
Presidenti ka thënë se kemi probleme me varfërinë, por shtoi se duhet të ndihmojë amerikanët për shkak të kontributit të tyre për Republikën e Kosovës. /tesheshi.com/
