Presidenti Hashim Thaçi, pas publikimit të raportit nga komisioni për matjen e territorit, ka kërkuar që qeveria të procedojë projektligjin për Demarkacionin me Malin e Zi, ditët në vijim, duke hedhur ndërkohë akuza në drejtim të opozitës.
Por ai ka goditur jo pak edhe dy partitë e koalicionit, PDK e LDK, duke thënë se përkundër pengesave që mund të kenë duhet të tregojnë guxim që të marrin vendime të mëdha.
Duke iu bërë thirrje deputetëve të votojnë marrëveshjen në fjalë, në një mënyrë Thaçi u ka bërë presion direkt.
“Është për keqardhje fakti që spektri politik kosovar nuk po bashkohet në çështjet që janë me interes për qytetarët e Kosovës. E ftoj të gjithë spektrin politik që, pa dallim përkatësie politike apo etnike, të bashkohen për të ardhmen evropiane të Kosovës. Deputetët e duhet vënë interesin shtetëror përpara atij personal apo partiak, dhe me votën e tyre pro kësaj marrëveshjeje, t’i japin fund izolimit të qytetarëve të Kosovës. Liberalizimi i vizave duhet të ndodhë tani dhe ky është interes nacional dhe shtetëror”, ka shkruar Thaçi, në Facebook.
Ai më tej thotë se përgjegjësia për të ratifikuar marrëshjen fillimisht i takon koalicionit qeverisës e pastaj edhe partive opozitare.
“Sërish e ftoj spektrin politik për unitet në këtë çështje të interesit thelbësor për qytetarët e vendit, si dhe ritheksoj faktin se kur bëhet fjalë për vendime të interesit shtetëror, koalicioni qeverisës duhet të tregojë se ka forcën politike, vizionin dhe lidershipin që të marrë vendimet e drejta e të domosdoshme”, ka thënë më tej Thaçi.
Pavarësisht kërkesave të parreshtura të pushtetarëve drejtuar opozitarëve që të japin votën për këtë marrëveshje, këta të fundit kanë paralajmëruar kundërshtim të fuqishëm pasi thonë se nuk do lejojnë që vendi të humbë territor. /tesheshi.com/
