Nga Blendi Gashi
Hashim Thaçi e ka nisur me të “egër” karrierën presidenciale, duke bërë disa deklarime të forta, a thua se nuk pati mundësi t’i bënte në kohën që qeveriste. E ndër to, si e para fare, është ajo për dekriminalizimin e qeverisjes, ndërkohë që deri dje ishte pjesë e saj; dhe ky deklarim gati-gati e penalizon, politikisht e ligjërisht, pasi futet tek “mosdenoncimi i krimit” për arsye përfitimesh politike.
“Duhet ta rikthejmë besimin qytetar tek insitucionet, me punën tonë duhet të rrisim besimin tek shteti ynë”, ka thënë Thaçi ditë më parë në ceremoninë e organizuar nga Ministria e Drejtësisë në tetë-vjetorin e Kushtetutës.
Por deklarata e Thaçit bie ndesh me veprimet që ai ka marrë gjatë kohës sa ishte kryetar partie, por edhe shef i ekzekutivit.
Janë hiç më pak se shtatë kryetarë aktualë të komunave nga PDK-ja, ish-partia e Thaçit, që ballafaqohen me ligjin.
Dhe përkundër faktit se ndaj tyre ishin ngritur aktakuza, Thaçi rikandidoi në zgjedhjet e fundit lokale pikërisht ata njerëz që dyshohet se janë marrë me krim të organizuar dhe korrupsion.
Thaçi të fillojë me veten, të largohet nga posti i presidentit
Avni Arifi, njëri nga njerëzit më të fuqishëm në AAK-së, njëherit këshilltar i kreut të partisë së Ramush Haradinaj, ka thënë se ideja e Thaçit për dekriminalizimin e institucioneve është e mirë, por për të ndodh një gjë e tillë ai duhet së pari të merret me veten dhe të largohet nga posti i presidentit.
“Z. Thaçi është arkitekt i korrupsionit në Kosovën e pasluftës. Deklarata e tij është aq joserioze sa nuk e vlen me u marrë me të. Kosova ka një president me trashëgimi të pasur korrupcioni dhe kjo nuk ndryshon me asnjë deklaratë”, ka deklaruar Arifi, për tesheshi.com.
Analisti politik, Islam Krasniqi, deklaratat e Thaçit i quan retorikë ditore dhe show medial.
Islami thotë se dëshmia më e mirë për një gjë të tillë është se të gjithë kryetarët e ish-partisë së tij PDK-së janë nën hetime, (ka aktakuza të ngritura ndaj tyre), si dhe të gjithë ministrat e kanë keqpërdorur pozitën e tyre.
“Nuk besoj që z.Thaçi mund te bëjë ndonjë ndryshim të madh, edhe pse është njeriu më i fuqishëm në vend si për nga vota ashtu edhe për nga pushteti, por mos të harrojmë e ka edhe përkrahjen ndërkombëtare sepse ka vepruar në bazë të këshillave të tyre”, shprehet Islami, për tesheshi.com.
A do të ketë fuqi Thaçi të përballet me bashkëpartiakët e tij?
Betim Musliu nga Instituti i Kosovës për Drejtësi, ka thënë për mediat se ironia është se deklaratat po vijnë nga njeriu që udhëhoqi partinë e cila për dy mandate ishte në krye të qeverisë e që pati në dorë dekriminalizimin e skenës politike.
Por Musliu, pos fjalëve pret hapa konkretë nga presidenti Thaçi. Dhe sipas Musliut, nëse Thaçi e nis dekriminalizimin që nga ish-bashkëpartiakët e tij të dikurshëm të cilët përballen me gjykata për shkak të shkeljeve të ligjit. /tesheshi.com/
