Thaçi për “Danas”: fushata serbe kundër Kosovës në UNESCO shkon kundër dialogut të Brukselit

Ish-kryeministri i Kosovës, aktualisht ministër i Jashtëm, Hashim Thaçi thotë se fushata negative që Serbia i ka bërë anëtarësimit të Kosovës në UNESCO, shkon kundër frymës së dialogut në Bruksel dhe kundër marrëveshjeve të nënshkruara.

Duke komentuar për gazetën “Danas” të Beogradit, Hashim Thaçi nënvizon se reagimi i Serbisë është i papranueshëm. Prishtina zyrtare ka dërguar nota proteste në të gjitha vendet ku zyrtarët serbë kanë lobuar me një gjuhë që shkon kundër frymës së normalizimit të marrëdhënieve.

Thaçi argumentoi se ambasadori serb në Paris ka ftuar në një front ambasadorët e krishterë kundër Kosovës, e këtë e ka cilësuar për të përdorur një fjalë të butë, “një reagim shumë ekstrem”.

“Mendoj se shumica e shteteve të UNESCO-s vlerëson që ne nuk jemi të angazhuar në një fushatë të tillë negative dhe, të them të vërtetën, nuk lodhem nga taktikat serbe, por jam i fokusuar në mbledhjen e votave për të rinjtë e Kosovës që të fitojnë të njëjtat shanse si të gjithë të rinjtë e tjerë në botë për pjesëmarrje në agjencinë botërore që i kushtohet kulturës, arsimit dhe shkencës”, tha Thaçi.

Javën e kaluar, 44 shtete kanë dhënë mbështetjen e tyre që kërkesa e Kosovës për anëtarësim në UNESCO të përfshihet në axhendën e Këshillit Ekzekutiv të agjencisë. /tesheshi.com/