Presidenti Hashim Thaçi, në konferencën për media pas takimit me partitë politike dhe Komisionin Qendror të Zgjedhjeve, por pa LDK-në që e bojkoti këtë takim, ka njoftuar se 11 ose 18 qershori janë datat e mundshme për zgjedhjet e jashtëzakonshme.
“Dëgjuat opinionin e 20 partive politike të Kosovës është nhjë opinion që si president i vendit do ta respektoj. Në ditët e ardhshme si presidenti i vendit do ta caktoj datën e zgjedhjeve në mënyrë që zgjedhjet të jenë fer të lira dhe demokratike”, deklaroi Thaçi pas takimit.
Shumica e partive parlamentare u pajtuan për 11 qershorin, ditë në të cilën Kosova do të luajë ndeshjen kundër Turqisë në Shkodër.
Nënkryetari i PDK-së, Hajredin Kuçi ka thënë se kjo parti propozon që zgjedhjet të mbahen më 11 qershor.
Deputeti i Lëvizjes Vetëvendosje, Smajl Kurteshi ka propozuar që zgjedhjet të mbahen më 18 qershor, pasi sipas tij në atë kohë vinë edhe mërgimtarët dhe kështu do t’u mundësohej atyre të votonin.
Shefi i grupit parlamentar të AAK-së, Pal Lekaj ka thënë se AAk është që të mbahen zgjedhjet me 11 qershor.
Ndërkohë, Valdete Bajrami nga NISMA nuk ka përmendur data duke u shprehur se kjo është kompetencë e presidentit.
Ndërkaq, Aleanca Kosova e Re, Lëvizja për Bashkim dhe Partia e Drejtësisë po ashtu kanë propozuar që më 11 qershor të mbahen zgjedhjet.
Ndërsa Lidhja Demokratike e Kosovës e ka bojkotuar këtë takim me arsyetimin se nuk e njeh Thaçin president pas prishjes së koalicionit.
Ndryshe, nëse vendoset për 18 qershorin, atëherë Kosova do t’i mbajë në datë të njëjtë me zgjedhjet e parlamentare në Shqipëri. /tesheshi.com/
