Ndonëse presidenti Thaçi pas takimit të mbajtur sot në mëngjes me përfaqësuesit e partive tha se në ditët e ardhshme do vendos për datën e zgjedhjeve lokale, ai e ka marrë vendimin vetëm pas më pak se katër orësh.
Thaçi, ka caktuar datën 22 tetor 2017 për mbajtjen e zgjedhjeve lokale, datë të cilën sot e propozuan të gjitha subjektet.
“Në mbështetje të nenit 4 të Ligjit Nr.03/L–072 për Zgjedhjet Lokale, nenit 6 të Ligjit Nr.03/L–094 për Presidentin e Republikës së Kosovës, pas konsultimit me partitë politike, presidenti Thaçi ka marrë vendim që zgjedhjet për organet vetëqeverisëse lokale të mbahen më 22 tetor 2017. Presidenti ka udhëzuar Komisionin Qendror të Zgjedhjeve që t’i ndërmarrë të gjitha veprimet e nevojshme për organizimin dhe mbajtjen e zgjedhjeve lokale, në përputhje me vendimin e tij dhe legjislacionin në fuqi”, thuhet në njoftimin e presidentit.
Kujtojmë se kryetarja e KQZ-së, Valdete Daka në takimin e sotëm me përfaqësuesit e partive tha se “data sa më e hershme të bëhet është më mirë sepse po shkojmë kah stina e dimrit dhe shumë komuna mund të shkojnë në balotazh dhe certifikimi mund të shtyhet”./tesheshi.com/
