Përkundër se SHBA dhe sekretari i përgjithshëm i NATO-s, Jens Stoltenberg, janë shprehur kundër themelimit të ushtrisë në mënyrë të njëanshme, presidenti Thaçi nuk e ka ndërmend të heq dorë.
Ai në një prononcim për Radio “Evropa e Lirë”, ka mohuar që veprimi të jetë i një anshëm derisa ka shtuar se Beogradi nuk mund të vendos për Kosovën.
“Nuk është veprim i njëanshëm, por nëse ndonjë vend mendon që Kosova duhet të jetë e koordinuar me Serbinë, diçka e tillë nuk do të ndodh. Beogradi nuk do të mund të vendos për Kosovën. Kosova ka institucionet e veta legjitime është vend sovran dhe i pavarur dhe diçka të tillë ja kam bërë të qartë edhe dje kryeministrit të Serbisë Vuçiq, të cilit i kam kërkuar që të ushtrojë ndikimin për rikthimin e serbëve në institucionet e Kosovës, në mënyrë që të votohet Asociacioni dhe Demarkacioni gjithashtu edhe të ndodhin ndryshimet Kushtetuese për FSK-në përgjigja e tyre ishte hezituese, prandaj kthim prapa nuk ka, FSK duhet të transformohet në ushtri të Kosovë“, tha Thaçi.
Ai ka përsëritur se Ballkani nuk rrezikohet nga roli i FSK-së pasi që sipas tij, funksioni i saj është në përputhshmëri me kornizat euro-atlantike, vlerat dhe standardet e tyre.
Thaçi tha se FSK-ja është forcë me vlera me vizion euro-atlantik dhe luan rolin e paqes dhe stabiliteti në rajon.
“Ballkani perëndimor rrezikohet nga bazat ushtarake ruse në Serbi, nga aeroplanët MIG, të Rusisë në Serbi dhe nga manovrat ushtarake ruse në Serbi“, ka deklaruar Thaçi.
Kjo deklaratë e presidentit vije pas një takimi që zhvilloi sot me ambasadorin amerikan, Greig Delawie.
Raportohet se Thaçi në ora 18:00 do të mbajë një konferencë për media në Presidencë ku do flet më hollësisht për reagimet e ndërkombëtarëve lidhur me ndryshimin e ligjit për FSK-në. /tesheshi.com/
