Kosova është e gatshme të bëjë kompromis me Serbinë për zgjidhjen çështjeve të hapura midis dy vendeve – është mesazhi që presidenti i Kosovës Hashim Thaçi i ka përcjellë homologut amerikan Donald Trump, me anë të një letre.
“Unë do të jem i gatshëm dhe i hapur për kompromiset e nevojshme në mënyrë që të arrihet një marrëveshje gjithëpërfshirëse dhe e balancuar për zgjidhjen e të gjitha çështjeve të pazgjidhura dhe në këtë mënyrë t’i japim më në fund paqen të gjithë rajonit”, është shprehur Thaçi.
Nuk është e qartë se pse Thaçi e ka përcjellë këtë letër pikërisht tani, gati një muaj e gjysmë pasi mori një letër nga Trump me anë të së cilës ftohej në Shtëpinë e Bardhe me homologun serb Vuçiç, nëse do arrinin një marrëveshje gjithëpërfshirëse me Serbinë pas 20 vitesh që nga mbarimi i luftës.
Letra e tij ndaj Trump vjen në një kohe raportesh të acaruara me kryeministrin Haradinaj, si për çështjen e prekjes së kufijve, e si për atë të taksës ndaj Serbisë. /tesheshi.com/
