Në një intervistë për Zërin e Amerikës, presidenti Kosovar Hashim Thaçi, ka sqaruar pozicionin e tij karshi kërkesës së një grupi deputetësh për ta shfuqizuar Gjykatën Speciale formuar në 2015-ën, e cila pritet të targetojë ish-krerë të UÇK-së, mes tyre dhe vetë Thaçin. Por ky i fundit, u tregua i patrembur nga “kërcënimi” i Speciales.
“Nga drejtësia nuk kam, nuk kam pasur dhe nuk do të kem kurrë dhe është mirë që Kosova ka qenë shembulli më i mirë në rajon për bashkëpunim me drejtësinë. Kosova nuk ka asgjë për të fshehur, Ushtria Çlirimtare e Kosovës ka zhvilluar luftë të pastër si loti; është lëvizja guerile më e suksesshme që ka ndodhur ndonjëherë në botë; ne nuk kemi sulmuar askënd; kemi zhvilluar luftën për ta larguar Serbinë nga Kosova dhe kjo është fitorja më e madhe e kombit”.
Nga ana tjetër, Thaçi e ka quajtur normale që deputetët të shfaqin opsione të ndryshme lidhur me Specialen, e thënë kjo me një gjuhë tejet të kujdesshme dhe diplomatike.
“…sot opinionet që paraqiten prej deputetëve janë opinione të njerëzve të zgjedhur, legjitimë dhe përfaqësues të popullit, proceduralisht të rregullta ligjore dhe kushtetuese; mendoj se ka një qasje të ekzagjerimit të opinionit të deputetëve të Parlamentit të Kosovës, sepse po ky parlament edhe në vitin 2015 e ka miratuar. Përfaqësuesit e popullit sot kanë opinione të ndryshme për këtë çështje, por nga ajo që kam lexuar, askush nuk është kundër sistemit të drejtësisë, kundër gjykatës, por e shohin si një opsion alternative”, theksoi kreu i shtetit kosovar. /tesheshi.com/
