Në samitin e parë si kryetar shteti, Presidenti i Kosovës, Hashim Thaçi, ka bërë thirrje për pajtim mes popujve të Ballkanit, që kanë qenë në konflikt permanent mes vetes.
Duke folur në samitin e liderëve të rajonit që po zhvillohet në Sarajevë, Thaçi tha se “Është koha për një hap të ri, atë të ndërtimit të besimit mes popujve dhe vendeve tona.
Pajtim, mirëbesim, miqësi, bashkëpunim, integrim, këto janë e ardhmja e rajonit”.
Këtë vit, mysafir i nderit në samit, ishte Presidenti i Italisë, Sergio Mattarella.
Kryesuesi i Presidencës së Bosnje e Hercegovinës, Bakir Izetbegoviq, si mikpritës i samitit, duke hapur mbledhjen plenare, tha se është përgjegjësia e liderëve politikë, që jo vetëm të takohen, por edhe të përmirësojnë marrëdhëniet mes vendeve.
Presidenti i Sllovenisë, Borut Pahor, u shpreh se Europa është e preokupuar me problemet e saj të brendshme, prandaj shtetet e Ballkanit Perëndimor ë duhet të kërkojnë mënyra për të përmirësuar bashkëpunimin dhe integrimin e rajonit.
Samiti përfundoi me Deklaratën e Përbashkët, me të cilën krerët e shteteve të rajonit u zotuan për dialog, mirëkuptim, pajtim dhe besim. Gjithashtu, në këtë deklaratë theksohet edhe përkushtimi për të bashkëpunuar në ballafaqimin me sfidat që e kërcënojnë rajonin dhe për të evituar armiqësitë e shekullit të kaluar, për barazi dhe zhvillim dhe për të përkrahur njëri-tjetrin në proceset integruese.
Samiti i Bërdo-Brijunit është një nismë e presidentëve të Sllovenisë dhe të Kroacisë, si dy shtete anëtare të BE-së, i cili synon forcimin e bashkëpunimit rajonal dhe nxitjes së dialogut politik të rajonit të Ballkanit dhe BE-së.
/tesheshi.com/
