Orë para udhëtimit për në Hagë për t’u përballur me aktakuzën e Speciales, presidenti Thaçi dha te kuptuar se ndaj tij, ose me anë të tij, u bë një komplot kundër SHBA-së, në prag të takimit të 27 qershorit, ku me ndërmjetësimin e të dërguarit Grenell, e njëherësh me anashkalim të plotë të BE-së, do mundësohej rinisja e Dialogut në Shtëpinë e Bardhë, nën kujdesin dhe personalisht të presidentit Trump.
“…E theksoj, atë rrugëtim e prenë apo e ndërprenë por besimin në vlerat e SHBA dhe botën perëndimore nuk mund ta lëkundë askush”, tha Thaçi në një intervistë për Top Channel.
Ai tha se nuk i druhej fare Speciales, që në fund fare, edhe pse e papranueshme si gjykatë, duhej votuar, siç dhe u votua në Kuvendin e Kosovës pak vite më parë.
“E di se ka qenë një padrejtësi historike kur janë themeluar këto Dhoma të Specializuara por dua të theksoj edhe sot se ka qenë një vendim shumë i rëndë i Kuvendit të Republikës së Kosovës por një vendim strategjikisht i drejtë sepse ne duhet çdo rrethanë pavarësisht sakrificave që kemi paguar më herët dhe që përballemi edhe sot, besimi në botën perëndimore veçanërisht në aleatët tanë që na ndihmuan për të fituar lirinë dhe pavarësinë e Kosovës me SHBA, NATO-n dhe BE duhet ta kemi të palëkundur dhe në anën tjetër kemi pasur mundësinë o të vazhdojmë me NATO-n, SHBA e BE ose te mbetemi në duart e vendeve që nuk e kanë njohur pavarësinë e Kosovës dhe kjo çështje e Dhomave të Specializuara të bartet në Këshillin e Sigurimit të Organizatës së Kombeve të Bashkuara”, arsyetoi presidenti i Kosovës.
Ai dhe njëherë u shpreh i bindur se nuk është implikuar në asnjë krim lufte, për të cilin mund të akuzohej.
“Unë e kam theksuar më herët: mund të kem bërë gabime politike, mund të kemi bërë lëshime politike. Është e vërtetë që kemi shkelur ligje të sistemit të Sllobodan Millosheviçit dhe për këtë jam shumë krenar si popull dhe si individ. Ndërsa asnjë ligj ndërkombëtar në asnjë rrethanë por ky është çmimi lirisë“, tha Thaçi, transmeton TCH. /tesheshi.com/
