Në Shqipëri ai shihet me urrejtje nga anti-komunistët, ndërsa në Kosovë nderohet me “Urdhërin e Lirisë”. Ky është Gramoz Ruçi, kreu i Kuvendit të Shqipërisë, i cili po viziton Kosovën.
Dhe është pikërisht Presidenti Thaçi që e ka dekoruar Ruçin me “Urdhrin e Lirisë”, duke shtuar se kjo medalje shkon për kontributin e dhënë nga Ruçi për lirinë dhe pavarësinë e Kosovës.
Kryeparlamentari shqiptar tha se ndjehet i kënaqur që vizitën e parë të tij në këtë post po e zhvillon në Kosovë. Ai këtë medalje e ka konsideruar si tepër të veçantë, meqë po merret prej presidentit të Kosovës.
“Kam kënaqësi të jem për vizitë të parë në Kosovë, unë ju falënderoj shumë. Këtë vlerësim do ua dërgoj bashkëatdhetarëve të mi në Shqipëri”, tha ai.
Ruçi paraprakisht është takuar me me homologun e tij Kadri Veselin me të cilin janë dakorduar për krijimin e një komiteti i cili ka për qëllim zgjidhjen e probleme legjislative, duke përfshirë çështjet e studentëve të të dyja vendeve, lejes së qëndrimit dhe regjimit doganor.
“U dakorduam që të dy parlamentet të krijojnë një komitet ashtu sikurse kemi komitet ne në Shqipëri në bashkimin evropian për të zgjidhur problemet legjislative, për të lehtësuar mjaft pengesa siç janë çështja e studentëve, qoftë ë studentëve shqiptarë në Kosovë, qoftë të studentëve të Kosovës në universitet shqiptare, me qëllim që në harkun maksimumi brenda një viti të gjithë problematikën e evidentuar deri tani me pengesa të zgjidhen, e njëjta gjë edhe sa i përket lëvizjes së njerëzve, lejeve të qëndrimit, apo çështjeve të regjimeve doganore”, tha Ruçi.
Tashmë në rradhë për të t’u takuar, është kryeministri Haradinaj. /tesheshi.com/
