Presidenti Hashim Thaçi, në një konferencë për media ka bërë të ditur se qëndirmi i tij për të themeluar ushtrinë mbetet i palëkundur përkundër reagimeve të SHBA-ve dhe NATO-s.
Ai ka deklaruar se iniciativa nuk është e njëanshme dhe FSK është plotësisht e gatshme për t’u bërë ushtri.
“Pres nga NATO që të jetë e vetëdijshme për këto rreziqe konkrete (ndikimin e Rusisë në rajon dhe terrorizmin) dhe të mos shqetësohet për transformimin e FSK-së duke ditur se FSK është trajnuar pikërisht nga NATO dhe shtetet anëtare të NATO-s. E thash një gjë të tillë si përgjigje e drejtpërdrejtë ndaj shqetësimeve të ngritura nga NATO, sekretarit të NATO-s dhe SHBA-së. Ai më tha se gjoja se NATO e konsideron iniciativën tonë si veprim të njëanshëm. Kjo nuk qëndron. Në asnjë rrethanë sepse për tri vite me radhë jemi munduar që të bindim edhe deputetët serbë që të votojnë për një gjë të tillë, por Serbia vazhdon të mbetet kundër”, ka thënë Thaçi.
Ai i ka bërë thirrje NATO-s dhe SHBA-së ta ndihmojnë Kosovën në transforimin e ushtrisë e jo ta pengojnë, duke thënë se është i bindur se transformimi i FSK-së do mbyllet me përkrahje të ndërkombëtarëve dhe atë suksesshëm.
Thaçi deklaroi më tej se do përpiqen që me durim dhe argumente t’ia sqarojnë partnerëve ndërkombëtarë dhe shtetve fiqnje që kanë dilema këtë proces.
Presidenti më tej ka pohuar se për çështjen në fjalë nuk do të ketë dakordim me Serbinë.
“Fati i Kosovës dhe ushtrisë sonë nuk do të lejojmë të mbetet peng i Serbisë dhe me asnjë synim”, ka deklaruar ai.
Thaçi më tej ka thënë se pret që qeveria dhe kryeministri Isa Mustafa t’i japin mbështetje projektligjit të proceduar në qeveri për ushtrinë.
“Jam i bindur se edhe qeveria, kryeministri Mustafa do ta trajtojë draftligjin për FSK në periudhën ligjore dhe shumë shpejt do japë edhe mendimin pozitiv për këtë ligj. Projektligji për ushtrinë e ka unifikuar spektrin politik dhe ka forcuar besimin e qytetarëve të vendit për të marrë vendime në interes të qytetarëve dhe shtetit”, ka thënë Thaçi, duke kërkuar nga deputetët që të japin votën e tyre pro themelimit të ushtrisë. /tesheshi.com/
