Nga Blendi Gashi
Qeveria e Kosovës në krye më Isa Mustafën ende nuk e di se kur mund të formohet ushtria, pra se kur Forca e Sigurisë së Kosovës do të shndërrohet në Forca të Armatosura, ndonëse e ka ndër premtimet më të bujshme.
Një premtim të tillë e dha edhe Hashim Thaçi sa ishte në pozitën e kryeministrit, konkretisht para zgjedhjeve parlamentare, ku në çdo fushatë anembanë vendit theksonte se Kosova do ta ketë ushtrinë e saj. Por asgjë, veça faktit se ai u bë president, i një shteti pa ushtri.
Sigurisht, se mosdhënia e një kohe se kur mund të ndodh transformimi i FSK-së në FAK është dëshmi e qartë se qeveria “Mustafa” mund ta ketë fatin e njëjtë si qeveria “Thaçi 2” që dështoi të themelojë ushtrinë.
Padyshim se fajtori kryesor për këtë është partneri aktual i koalicionit, të PDK-së e LDK-së, Lista Serbe e cila në mënyrë të vazhdueshme e kundërshton themelimin e ushtrisë.
Zyrtarë të kësaj liste që janë pjesë e kabinetit qeveritar “Mustafa”, vazhdojnë haptazi të shprehin qëndrimin e tyre kundër themelimit të ushtrisë.
Kryeministri Mustafa, duke qenë i vetëdijshëm për refuzimin e ashpër që po i bën partneri i koalicionit nga radhët e komunitetit serb për çështjen në fjalë, deklaratat se do të formohet ushtria, padyshim se më shumë i bën për konsum politik, pasi as kreu i ekzekutivit, por as ministri i FSK-së, Haki Demolli nuk e kanë guximin të thonë se ushtria mund të mos bëhet edhe sivjet për shkak të Listës Serbe.
“Do ta themelojmë ushtrinë e Kosovës”
Kryeministri Isa Mustafa, në një status bërë ditë më parë në Facebook, tha se Kosova është në momentet e saj historike, dhe se pas pranimit në UEFA e FIFA dhe rekomandimit pozitiv për vizat, vendi është në rrugë të themeloijë edhe ushtrinë, por që sigurisht nuk tha se kur saktësisht do të ndodh një gjë e tillë.
“Jemi në momente historike, të cilat na bashkojnë dhe na qojnë në rrugën e ardhmërisë. Edhe në rrugën e themelimit të Forcave të Armatosura, sikurse edhe të asaj të zhvillimit më të shpejtë ekonomik dhe social dhe të integrimit euroatlantik”, ka shkruar Mustafa.
Ushtria nuk votohet në televizione e portale
Por, njohësit e çështjeve të sigurisë thonë se ushtria themelohet duke punuar në institucione e jo përmes postimeve në Facebook e paraqitjeve mediale.
Ndërsa deputetë të opozitës, shprehin bindjen e plotë se as këtë vit, vendi ynë nuk do të bëhet me ushtri për fajin e udhëheqjen aktuale.
Njohësi i çështjeve të sigurisë, Burim Ramadani ka thënë për te sheshi.com se ushtria nuk themelohet në media, por në institucione.
Ramadani shprehet i habitur se si askush nga qeveria nuk e demantoi zv.kryeministrin Branimir Stojanoviqin, i cili ka thënë se “Lista Serbe” është kundër themelimit të ushtrisë së Kosovës. Ramadani thotë se kjo i bjen që askush nga koalicioni qeverisës PDK-LDK nuk ka kërkuar nga “Srpska” të votojë për transformimin e FSK-së në FAK.
“Ushtria nuk themelohet në media. Nuk votohet nëpër televizione e portale. Votohet në institucione. Dhe, aty qeveria i ndan privilegjet pikërisht me Listën Serbe që po thonë se nuk i kanë kërkuar të votojnë për ushtrinë”, thotë Ramdani.
Qeveria “Mustafa” s’mund ta bëj ushtrinë
Edhe deputetja opozitare, Valdete Bajrami nga NISMA për Kosovën. është tejet skeptike se qeveria aktuale mund ta krijojë ushtrinë.
Bajrami ka thënë për tesheshi.com se duke parë që qeveria aktuale për asnjë moment nuk ka punuar për interesat e qytetarëve dhe të shtetit, duke parë që dy partitë në pushtet, PDK dhe LDK të gjithë potencialin e tyre ta harxhojnë në dialogun me Serbinë, nuk mendon se ekzekutivi aktual mund të bëj ushtrinë.
“Duke qenë në dijeni se PDK dhe LDK janë në agjendën e Beogradit, është e ditur se Lista Serbe dhe Beogradi nuk e përkrahin formimin e ushtrisë. Andaj, kjo qeveri jo legjitime bën mirë të shkoj sa më parë sepse shumë pengesa dhe dëme i ka sjellë vendit”, thotë Bajrami.
Ish-shefi i Listës Serbe kundërshton fuqishëm themelimin e ushtrisë
Në debatin për themelimin e FAK-ut është përfshirë edhe Aleksandër Jabllanoviq, themeluesi i Listës Serbe, njëherit ish-ministri për Komunitete e Kthim në qeverinë Kosovës (i shkarkuar në janarin e vitit 2015 pas fyerjeve të nënave të viktimave të luftërave në Gjakovë).
Jabllanoviq ka thënë për mediat serbe se pocesi i formimit të Forcave të Armatosura të Kosovës mund të bëhet vetëm me ndryshimin e Kushtetutës së Kosovës “e serbët nuk do të duhej të e nuk do të guxonin të përkrahin këtë vendim, sepse ky vendim për popullin dhe shtetin tonë do të ishte rrugë në një drejtim”.
“Duke votuar për ushtrinë e Kosovës do të pështynim në varrin e çdo ushtari e polici të vrarë e të plagosur në Kosovë”, ka thënë Jabllanoviq.
Ish ministri i kabinetit qeveritar “Mustafa” njëkohësisht ka thënë se në Kosovë është në fuqi Rezoluta 1244 e KS të KB-së, sipas së cilës i vetmi formacion i armatosur është KFOR-i me mundësi të kthimit të pjesëtarëve të ushtrisë serbe. /tesheshi.com/
