Presidenti i Kosovës Hashim Thaci e ka shumë seriozisht punën e bashkimit me Preshevën. Kjo pasi ai ka prezantuar një draft-rezolutë ku kërkohet që shqiptarët e Luginës së Preshevës të jenë pjesë e dialogut ndërmjet Kosovës dhe Serbisë, si dhe përfaqësuesi i tyre të jetë pjesë e delegacionit të bisedimeve.
Draft-rezoluta është dërguar për shqyrtim dhe miratim te Kuvendit të Kosovës, ku kërkohet të mbështetet siç tha ai “kërkesa legjitime e shqiptarëve të Luginës”. “U bëj thirrje deputetëve të Kuvendit të Kosovës që të mos i injorojnë kërkesat legjitime të shqiptarëve të Luginës së Preshevës. Ne e kemi obligim që t’i mbështesim në realizimin e kërkesave të tyre” ka shkruar Thaçi.
Ai ka kërkuar që kësaj radhe të lihen anash përkatësitë politike, dhe të ngritet çështjes e Preshevës nëpër forumet ndërkombëtare si dhe në bashkëpunimet Kosovë-Shqipëri. Gjithashtu thuhet se e drejta e tyre për vetëpërcaktim është kërkesë legjitime dhe se kërkesat e qytetarëve të Luginës së Preshevës, i ndihmojnë stabilitetit dhe marrëdhënieve Kosovë-Serbi. Në këtë rezolutë përmendet respektimi i vullnetit politik të shqiptarëve të Luginës së Preshevës, i shprehur në referendumin e vitit 1992. /tesheshi.com/
