Ish-presidenti Thaçi mbrojti veten e tij në Hagë, pasi u mbrojt dhe nga avokati, duke thënë se “padrejtësia nuk ndreqet me një padrejtësi tjetër”, referuar akuzave ndaj tij, të cilat nuk i pranon.
“Bota tani e di sot si rezultat i këtij procesi se nuk kishte trafikim organesh dhe se Shtëpia e Verdhë nuk ka ekzistuar kurrë. Tani e dimë se edhe unë edhe UÇK-ja, populli i Kosovës dhe gjithë shqiptarët jemi shfajësuar nga këto akuza. E vërteta është thënë dhe rreja e zezë mbi Kosovën është hequr. Pra, kjo sakrificë ja ka vlejtur”, tha Thaçi.
“Unë jam i pafajshëm për të gjitha këto akuza. Por, jam gati të përballen me këtë sfidë të re dhe të kem sukses për familjen time, popullin tim”, theksoi ai.
Thaçi tha se i vjen keq që disa dëshmitarë potencialë, që kanë vdekur, sikurse ish-presidenti i Kosovës, Ibrahim Rugova, ish-veprimtari politik, Adem Demaçi, ish-sekretarja amerikane e Shtetit, Madeleine Albright, Robin Cook e të tjerë, nuk do të mund të dëshmojnë në gjykimin ndaj tij.
“Ata do të kishin dëshmuar në emrin tim për atë që kam thënë dhe bërë gjatë asaj kohe shumë të rëndësishme në historinë e lirisë dhe pavarësisë së Kosovës”, tha ish-presidenti para trupit gjykues.
Ai potencoi synimet e luftës, duke thënë se “si rezistenca paqësore ashtu edhe ajo e armatosur kishin të njëjtin synim: lirinë, shtetësinë dhe rendin demokratik të Kosovë”.
“Qytetarët e Kosovës nuk donin luftë, lufta iu imponua” atyre, theksoi Thaçi.
Ndër të tjera, ai i mëshoi dhe kundërshtimeve politike me bashkëluftëtarët e tij pas luftës, prej së cilave është marrë lëndë për të krijuar akuzën.
“Emocionet, motivet apo mllefet politike të secilit aktor politik nuk duhet të kuptohen si fakte në këtë sallë. Kjo vlen edhe për disa botime apo opinione të pasluftës të ekzagjeruara apo të përshtatura të akterëve të ndryshëm të luftës.
Si në çdo shoqëri demokratike, edhe te ne, jo çdo bashkëluftëtar i luftës ka qenë edhe bashkudhëtar apo bashkëmendimtar i proceseve politike të pasluftës.
Në raste jo të pakta, ambicia, interesat politike e egoja personale tejkaloi të vërtetën dhe realitetin për rrëfimin e UÇK-së dhe vet historisë së Kosovës”, theksoi Thaçi. /tesheshi.com/
