Njeriu i dytë në Qeverinë e Kosovës, Hashim Thaçi, e ka konsideruar si betejë të vështirë anëtarësimin e vendit tonë në UNESCO, por është shprehur i bindur se do të ketë sukses në këtë drejtim.
“Është betejë e vështirë. Kosova është e vogël, por zëri ynë do të ndihet dhe me çdo fuqi që kemi, do të tentojmë ta anëtarësojmë Kosovën në UNESCO. Kërkoj edhe nga ju të jepni kontribut. Të dërgoni letra, të qeta, pozitive, me fokus në nevojat tona në arsim, shkencë dhe kulturë. Bëhuni edhe ju ambasadorë të Kosovës”, ka shkruar Thaçi në profilin e tij në “Facebook”.
Edhe në një postim, Komisioni për Politikë të Jashtme i Kongresit, ku bashkëkryesues është miku i shqiptarëve, Eliot Engel, u shkrua kjo porosi: “Bota duhet ta përkrahë anëtarësinë e Republikës së pavarur të Kosovës në UNESCO”, e shoqëruar me një link të artikullit nga “Radio Evropa e Lirë”, ku numërohen argumentet e përdorura nga zëvendëskryeministri Thaçi për arsyeshmërinë e aplikimit të Kosovës në UNESCO.
