Dy zyrtarë të lartë të AKI-së janë arrestuar nga autoritetet turke me të dalë nga Aeroporti i Stambollit, tetorin e vitit të kaluar.
Barlet Gashi, drejtor i operacioneve në Agjencisë e Kosovës për inteligjencë, dhe Driton Fetahu, drejtor i analizës, kishin hyrë në Turqi në mënyrë të paligjshme në kohën kur pritej kthimi i të miturit Erion Zeka nga Siria.
Kthimin e tij e kishte marrë përsipër Fitim Lladrovci, me kusht që kur të vinte në Kosovë të kishte lehtësira në procedurën penale. AKI-ja nuk ishte e implikuar në këtë rast, por kishte ndërhyrë për ta marrë atë si operacion të saj, shkruan sot ‘Koha Ditore’. Ligji për AKI-në i ndalon veprimet e këtij shërbimi jashtë territorit të Kosovës.
Kur u pat kthyer Erion Zeka nga Siria në Kosovë, ish-kryeministri i Kosovës, Hashim Thaçi, pati përgëzuar institucionet përgjegjëse të sigurisë për operacionin e suksesshëm për lirimin nga Siria dhe kthimin në familjen e tij të djaloshit 8 vjeçar.
“Në muajin qershor 2014, ne ishim të informuar nga shërbimi ynë inteligjent së shtetasi kosovarë Arben Zeka kishte udhëtuar në drejtim të Sirisë së bashku me djalin e tij të mitur 8 vjeçar, Erion Zeka. Erioni ishte marrë në këtë udhëtim përkundër kundërshtimit që kishte shfaqur nëna e tij. Për një kohë të gjatë, ky rast është përcjellë me shqetësim të madh nga ana e qytetarëve dhe institucioneve të Republikës së Kosovës”, thuhej një komunikatë të zyrës së Kryeministrit të Kosovës.
“Unë si kryeministër në bashkëveprim me presidenten menjëherë kemi autorizuar Agjencinë Kosovare të Inteligjencës (AKI) që ta ketë prioritet ketë rast. Si rrjedhojë e një pune serioze të vazhdueshme, ditë më parë AKI ka kërkuar aprovimin për të ndërmarrë një operacion për kthimin e tij të sigurt në Republikën e Kosovës. Në kuadër të përgjegjësive tona institucionale unë si kryeministër së bashku me Presidenten, pas konsultimeve dhe analizës përkatëse kemi aprovuar fillimin e këtij operacioni të rrezikshëm dhe të komplikuar”, thuhej në letrën e Kryeministrisë.
Sipas kësaj letre, menjëherë pas aprovimit të kërkesës, AKI me sukses ka realizuar një operacion për lokalizimin, gjetjen dhe kthimin e sigurt tek nëna e tij të të miturit Erion Zeka.
“Si kryeministër dua të shpreh mirënjohës time të lartë ndaj të gjithë atyre që kanë bërë të mundur kthimin e sigurt në Kosovë të Erionit. Unë dhe gjithë qytetarët e Kosovës jemi krenarë me punën tuaj serioze të institucioneve përgjegjëse të sigurisë”, thuhet në letrën e kryeministrit, e cila përfundon me thirrjen e kryeministrit për të gjithë qytetarëve të Kosovës që të mos mashtrohen në asnjë mënyrë nga çfarëdo forme e indoktrinimit për t’iu bashkangjitur konflikteve apo luftërave jashtë Kosovës.
AKI-ja vonë mori vesh se Erioni po kthehej nga Siria!
Por po të varej kthimi i 8-vjeçarit Erion Zeka në Kosovë nga Agjencia Kosovare e Inteligjencës, ai do të ishte ende në Siri, shkruan gazeta Koha Ditore. Sipas gazetës, kjo agjenci inteligjente nuk e ka ditur fare që tashmë prokurori special, Reshat Millaku, ishte në kontakt me një shqiptar në Siri, i cili ishte i gatshëm të kthehej në Kosovë së bashku me gruan e tij dhe Erionin.
Ai kërkonte garanci që kur të kthehej të mos i viheshin prangat dhe të paraburgosej. Këtë garanci e ka marrë nga shteti.
Me ta pranuar një shkresë të Millakut se i dyshuari për terrorizëm së bashku me gruan dhe Erionin i ishte dorëzuar Shërbimit sekret turk MIT që e kishin vendosur në një hotel në Turqi dhe kishin njoftuar autoritetet kosovare se tashmë Erioni ishte mirë dhe i sigurt, pakkush do të mund të besonte se një xhihadist nga Drenica do ta sillte Erionin nga Siria në Turqi.
Atë e kishte rrëmbyer nga një kamp me kosovarë, derisa i ati i tij ndodhej në front të luftës si pjesëtar i organizatës terroriste ISIS. Xhihadisti e kishte kapur djalin për të ikur në Turqi ku ka qëndruar një javë në pritje të rregullimit të dokumenteve.
Vetëm pas mbërritjes në tokën turke, larg fronteve të luftës dhe masakrave, AKI-ja e Bashkim Smakajt, së cilës iu dhanë meritat për kthimin e tij, kishte marrë vesh.
