Ndërsa tashmë është bërë e zakonshme vitet e fundit që presidenti Thaçi pas homazheve te varret të mos shkojë për vizitë në Kullën e Jasharajve, gjë që ndodhi edhe këtë përvjetor, kryeministri Haradinaj dhe kryeopozitari Kurti, pas homazheve kanë trokitur tek Kulla ku janë pritur nga Rifat Jashari, vëllai i komandantit Adem Jashari.
Rifat Jashari falënderoi kryeministrin Haradinaj për vizitën dhe ka uruar që asgjë e keqe të mos i ndodhë Kosovës.
“Falënderoj kryeministrin Ramush Haradinaj që ka ardhur me nda edhe këtë dhimbje edhe këtë krenari bashkë me ne. Shfrytëzoj rastin t’ua uroj gjithë shqiptarëve festat e marsit dhe ishalla asgjë e keqe më në jetë nuk na ndodh. Ishalla gjithmonë jemi bashkë, jemi vigjilentë që ta çojmë Kosovën përpara”, tha Rifat Jashari.
Homazhe dhe vizitë familjes Jashari ka bërë edhe ministri i FSK-së, Rrustem Berisha i cili tha se këto ditë të vështira që kaluan familja Jashari dhe populli shqiptar janë frymëzim për të punuar të gjitha institucionet.
Berisha shpreson se në çdo përvjetor do të vijnë raporte të mira për qytetarët e Kosovës.
“Patëm dëshirë të jemi pjesë e kësaj ceremonie, pjesë e përballimit e këtyre ditëve të vështira që i kanë pasur sepse siç e dimë kanë pasur ditë të vështira për familjen Jashari dhe gjithë popullin shqiptar. Kemi pas dëshirë të jemi pjesë e kësaj është një frymëzim për të gjithë ne që të vazhdojmë me punën tonë drejt forcimit të shtetit tonë, institucioneve shtetërore, institucioneve të sigurisë dhe mendoj që çdo herë e më shumë do të vijmë me vlera raportuese në çdo përvjetor në të mirë të gjithë qytetarëve”, tha Berisha.
Për të nderuar familjen Jashari dhe Epopenë e UCK-së, në Prekaz ka qëndruar edhe një delegacion i Lëvizjes Vetëvendosje me në krye kryetarin e saj, Albin Kurti, i cili pas homazheve shkoi tek Kulla e Jasharajve.
Para kësaj ai foli para gazetarëve, me ë’rast tha se “Epopeja e UÇK” ndryshoi historinë dhe politikën në vend. Sipas tij, familja Jashari bashkoi edhe më shumë popullin shqiptar.
“Sakrifica e Jasharëve i dha hovin vendimtar luftës çlirimtare. Epopeja e UÇK-së e 5,6,7 marsit ndodhi midis dy demonstratave shumë të fuqishme, asaj me dy mars 1998 dhe 9 mars 1998. E mbaj mend mirë se aq masive ishte demonstrata e 9 marsit dy ditë pas Epopesë së UÇK-së sa që edhe Policia e Serbisë u frikësua të ndërhynte. Atë ditë në banesat në Prishtinë nuk kishe mbetur kush, që të gjithë ishin në rrugë. Epopeja e UÇK-së e ndryshoi edhe politikën dhe historinë. Jasharët e kishin vënë popullin mbi familjen dhe kështu e ndryshuan popullin sepse bashkuan atë dhe ndryshuan secilën familje shqiptare sepse i vetëdijesuan ato. Gjithçka ndryshuan për ato tri ditë që ishin më shumë se 20 vite e këto 20 vite nuk duken as si tri ditë”, tha Kurti.
Përveç politikanëve edhe pse gjatë tërë kohës në Prekaz binte shi, kjo nuk i ndaloi qytetarët që të nderojnë familjen Jashari.
Kujtojmë se më 5,6 dhe 7 mars në Prekaz të Drenicës është zhvilluar beteja në mes të familjes Jashari dhe policisë serbe ku janë vrarë 50 anëtarë të kësaj familje. Për nder të “Epopesë së UÇK-së” sot do të mbahet një akademi përkujtimore ndërsa paradite është mbajtur edhe një konferencë shkencore lidhur me këtë rast.
Ndërsa dje. Kuvendi i Kosovës ka mbajtur seancë solemne ndërsa në Prekaz u zbulua mozaiku me figurën e Adem Jasharit e punuar nga 200 mijë fishekë. /tesheshi.com/
