“Kosova duhet të konsiderohet si pjesë e zgjidhjes së krizës së emigrantëve që ka përfshirë Evropën, dhe jo pjesë e problemit”, thotë ministri i Jashtëm i Kosovës, Hashim Thaçi në një intervistë të dhënë për gazetën britanike, “The Telegraph”.
Edhe Thaçi i është bashkuar thirrjes së homologëve të vet maqedonas e kroat, që gjatë samitit të Vjenës kërkuan një qasje të koordinuar të Europës ndaj krizës së emigrantëve.
“Kosova do të ndihmojë”, premtoi ai, duke paralajmëruar se Europa rrezikon të humbasë zemrën e vet ndaj emigrantëve.
“Gjatë luftërave në Ballkan, Evropa ka qenë fener i të drejtave të njeriut, të cilin të gjithë e kemi ëndërruar. Por, tani ka mjegull rreth këtij feneri dhe ne duhet ta pastrojmë atë”, ka thënë Thaçi.
Këto komente të ministrit të Jashtëm vijnë në një kohë që Kosova ka kaluar krizën e vet të emigracionit, kur që nga janari e shkurti me mijëra njerëz lanë Kosovën me destinacion Perëndimin, kryesisht Gjermaninë.
Thaçi vuri në dukje se numri i azilkërkuesve kosovarë në Gjermani ka rënë nga 13,000 në muajin mars, në 800 në korrik.
Pamjet e mijëra emigrantëve që kalonin kufirin mes Serbisë e Hungarisë bënë xhiron e botës, ndërsa Hungaria ka vendosur tashmë që kriza është përshkallëzuar me hyrjen e mijëra refugjatëve të luftës nga Maqedonia, të ndërtojë edhe një gardh mbrojtës.
Samiti i Vjenës pati në qendër të bisedimeve këtë krizë, ndërsa Kroacia dhe Maqedonia kërkuan ndihmë nga liderët europianë.
/tesheshi.com/
