Presidenti i Republikës së Kosovës, Hashim Thaçi ka ndjekur hapat e kryeministrit të Shqipërisë, Edi Rama, duke ftuar në Prishtinë liderët e partive politike shqiptare në Maqedoni të cilët i ka përgëzuar për mbajtjen e zgjedhjeve të lira dhe demokratike. Mirëpo për dallim nga Edi Rama i cili arriti të ulë në një tryezë të përbashkët të gjithë liderët, Thaçi ka diskutuar me çdonjërin në veçanti.
Në takimet e presidentit Thaçi me kryetarin e BDI-së, Ali Ahmeti; me kryetarin e Lëvizjes BESA, Bilall Kasami; dhe të Alencës për Shqiptarët, Ziadin Sela, është diskutuar nevoja për një koordinim të mirëfilltë të faktorit politik shqiptar që ka për qëllim respektimin e vullnetit të lirë dhe demokratik të votuesve shqiptarë të shprehur në zgjedhjet e parakohshme parlamentare në Republikën e Maqedonisë, më 11 dhjetor 2016.
Presidenti Thaçi po ashtu i ka përgëzuar për sjelljen e partive politike shqiptare para dhe pas rezultatit zgjedhor, i cili duhet të reflektoj momentin për të riafirmuar përcaktimet programore dhe strategjike të shqiptarëve që janë edhe në interes të së ardhmes evropiane të Maqedonisë.
Ndërsa nga ana tjetër, përfaqësuesit e partive politike parlamentare në Maqedoni kanë shprehur gatishmërinë e tyre për t’u angazhuar maksimalisht në përfaqësimin sa më të mirë të interesave të shqiptarëve dhe të prosperitetit e stabilitetit afatgjatë të Maqedonisë.
Kujtojmë se këto janë momente kyçe, por ndoshta edhe historike për partitë politike shqiptare në Maqedoni që të avancojnë kërkesat e tyre ndaj partnerit të koalicionit maqedonas, pasi që asnjëra nga partitë maqedonase nuk mund të formon qeveri pa mandatet e shqiptarëve. Andaj jorastësisht si Rama, po edhe Thaçi kanë bërë përpjekjet e tyre që të konsulltojnë dhe këshillojnë për një platformë të përbashkët të të gjitha partive politike shqiptare në interes të shqiptarëve.
Në fund vlen të potencohet fakti që edhe në këto takime njejtë si në Tiranë kanë munguar përfaqësues të PDSH-së, e cila në zgjedhjet e fundit ka shënuar rezultatin e saj më të dobët në historinë e tyre pas 20 vitesh, duke marrë vetëm 2 deputetë. Si pasojë e rezultateve të dobëta, kreu i PDSH-së, Menduh Thaçi ka dhënë dorëheqje të parrevokueshme nga posti i kryetarit të partisë. /tesheshi.com/
