Dy ditë pasi presidenti Thaçi paralajmëroi se shumë shpejt do themelohet ushtria, ai i ka dorëzuar projektligjin për ligjin e Forcës së Sigurisë së Kosovës (FSK) kryekuvendarit Kadri Veseli.
Pas dorëzimit të projektligjit, Thaçi tha se iniciativa e ndërmarrë nga ai është e domosdoshme për mbrojtjen e sovranitetit të vendit.
“Projektligji rregullon misionin, funksionin dhe detyrat e FSK-së. Si president i vendit do të doja që kjo të ndodhte nëpërmjet një procesi transparent. Por një gjë të tillë s’kemi arritur ta bëjmë pasi serbët nuk dëshirojnë t’i votojnë këto ndryshime kushtetuese. Ky qëndrim është për keqardhje i cili origjinën e ka në Serbi. Për mua si president dhe komandant suprem është e rëndësishme përmbajtja”, tha Thaçi.
Ai shtoi se personalisht ndihet shumë mirë me emrin “FSK” dhe ky emërtim është shumë adekuat për qytetarët e Kosovës të cilët tash e kanë në mendje dhe zemrat e tyre.
“Ky ndryshim i misionit në përputhje me ligjin e bën FSK-në ushtri moderne, me karakter mbrojtës dhe do të jetë në shërbim të paqes në rajon dhe botë. Ky transformim është krejtësisht kushtetuese. Ftoj shtetet anëtarë të NATO-s ta ndihmojnë FSK-në ashtu siç ka ndodhur edhe më parë. KFOR-i do të vazhdoj misionin e saj ashtu siç ishte. Brenda një periudhe kohore kryetari dhe kryesia e Kuvendit do të procedojë ndryshimet e ligjit për FSK-në i cili do të marrë përkrahjen e gjitha partive politike”, deklaroi Thaçi.
Kurse Kadri Veseli, pasi pranoi projektligjin tha se kjo është një ditë e mirë për Kosovën.
“Presidenti i Republikës ka proceduar tanimë projektligjin për FSK-në. Më lejoni të theksoj se që ditën e nesërme do të ftoj kryesinë e Kuvendit për hapat e mëtutjeshme dhe procedim. Kosova ka nevojë për rrumbullakimin e identitetit të saj shtetëror. Përmes transformimit Kosova është kontribuues i paqes në rajon. Shumica e kadetëve të FSK-së janë duke u trajnuar nëpër vende të ndryshme të botës. Do të jetë partner i sigurt për NATO-n dhe gjitha etnitetet”, tha Veseli.
Vlen të theksohet se ndryshimet ligjore për FSK-në pritet ta kenë përkrahjen edhe nga subjektet opozitare.
Me këtë projektligj të ri Kuvendi nuk do të ketë nevojë për votat e Listës Serbe për të krijuar ushtrinë. /tesheshi.com/
