Presidenti Thaçi ka refuzuar pjesëmarrjen në një Samit në Sarajevë, organizuar në kuadër të Procesit e Bashkëpunimit të Evropës Juglindore, ndryshe SEECP.
Kjo, pas deklarimit të kreut të Presidencës boshnjake, serbit Milorad Dodik, se Thaçi nuk do ftohet aty si president i Kosovës por si përfaqsues nga Prishtina.
Sipas Thaçit, Kosovën nuk guxon kush ta nënshtrojë.
“Përkundër vullnetit dhe gatishmërisë për të marrë pjesë në Samitin për Procesin e Bashkëpunimit në Evropën Juglindore (SEECP), ftesa denigruese e kryetarit aktual të kryesisë së Bosnjës dhe Hercegovinës, e bënë të pamundur pjesëmarrjen dhe përfaqësimin e Kosovës në këtë takim.
Kosova gjithmonë ka qenë dhe është e gatshme për marrëdhënie të mira fqinjësore me Bosnje e Hercegovinën dhe për njohje reciproke. Por, fatkeqësisht, ky vullnet i ynë është keqpërdorur në vazhdimësi, njësoj sikurse tani me rastin e organizimit të SEECP-së nga Bosnja e Hercegovina. Minimumi që kërkon Kosova për pjesëmarrje në forume të tilla është trajtimi i barabartë me shtetet tjera pjesëmarrëse.
Sjellja e Bosnjës dhe Hercegovinës është e papranueshme dhe paradoksale, meqë përfaqësuesit e saj aplikojnë praktika tërësisht antievropiane, që nuk dallojnë me ato të Serbisë. Me një qasje të tillë destruktive, bashkëpunimi rajonal dhe fqinjësia e mirë ndërmjet shteteve të Ballkanit Perëndimor mbetet një parakusht i paarritshëm në rrugën për anëtarësim në BE.
Republika e Kosovës mbetet e përkushtuar për fqinjësi të mirë, bashkëpunim rajonal dhe të ardhme euroatlantike, mirëpo nuk pranon të nënshtrohet dhe të diskriminohet nga askush”, shkroi Thaçi.
Siç dihet, bash prej sjelljeve të tilla të Bosnjes, në këtë rast krerëve serbë të saj, Kosova ka përfshirë në taksën e saj ndëshkuese dhe mallrat nga Bosnja. /tesheshi.com/
