Të mërkurën, presidenti i Kosovës Hashim Thaçi u takua më të dërguarin special të BE-së për dialogun Serbi-Kosovë Miroslav Lajçak, me të cilin diskutoi për gjetjen e mënyrave për të arritur një marrëveshje mbi njohjen e ndërsjelltë të Kosovës dhe Serbisë.
Në një konferencë për shtyp në Prishtinë, ai tha se biseda me Lajçak ishte konstruktive dhe se ai beson fuqimisht se e ardhmja e Kosovës është në NATO dhe Bashkimin Evropian.
“Mund të konkludoj se biseda jonë dhe takimi në përgjithësi ishte konstruktiv, i hapur dhe miqësor, në drejtim të gjetjes së mundësive për një marrëveshje përfundimtare ndërmjet Kosovës dhe Serbisë, e cila do të nënkuptonte njohjen reciproke të dy shteteve të pavarura dhe sovrane dhe mundësinë që Kosova të bëhet anëtare e Kombeve të Bashkuara”, tha Thaçi.
Presidenti i Kosovës përsëriti kritikat e tij ndaj BE-së për vonesën e gjatë në liberalizimin e regjimit të vizave për qytetarët e Kosovës, megjithëse, siç tha ai, Kosova plotësoi të gjitha kriteret.
Sipas tij, dialogu me Serbinë nuk duhet të kthehet në nivelin teknik.
“Unë besoj fuqimisht se ka ardhur koha që BE, nga ajo që unë shoh dhe ajo që është aktualisht e bashkuar në mbështetjen ndaj Lajçak, të vendosë në tryezë mundësinë e bisedimeve për njohjen reciproke, dhe kjo duhet të jetë pika e parë e marrëveshjes. Pastaj çështjet e tjera bëhen më të lehta, jo për të filluar ose vazhduar me çështje teknike, të cilat ne kemi diskutuar dhe negociuar për dhjetë vjet në Bruksel”.
“Në çdo rast, unë dua të besoj se vetëm njohja e ndërsjelltë me standardet e vendosura brenda një marrëveshje të mundshme që mund të arrihet, mund të jetë një mundësi e mirë që garanton stabilitetin në rajon, fqinjësinë e mirë dhe të ardhmen evropiane të Kosovës dhe Serbisë,” tha Thaçi.
Ai theksoi se kishte diskutuar të njëjtat tema me Lajçak disa ditë më parë në Bruksel, pastaj në Uashington me zyrtarë të lartë të SHBA, si dhe dy ditë më parë në Paris, dhe vlerësoi se kishte parë koordinimin e tyre të shkëlqyeshëm.
Lajçak tha nga ana e tij se ai ishte dakord me presidentin e Kosovës se Kosova ka nevojë për dialog dhe një marrëveshje gjithëpërfshirëse. /tesheshi.com/
