Presidenti Thaçi iu ankua kreut të ri të diplomacisë europiane, Joseph Borrell, mbi mosliberalizimin e vizave, duke e quajtur këtë të fundit një padrejtësi ndaj Kosovës.
“Për fat të keq biseduam me Borrell dhe e informova në veçanti sa i përket procesit të liberalizimit të vizave Kosova është trajtuar padrejtësisht, sepse Kosova ka implementuar në tërësi të gjitha kriteret që të ndodhë liberalizimi i vizave për Kosovën”, tha Thaçi në një konferencë shtypi me zyrtarin e lartë, pas një takimi mes tyre në Presidencë.
Borrell po viziton Kosovën, në të parin tur të tij diplomatik pas marrjes së detyrës së re, ku më pas do vijojë rrugën drejt Beogradit.
Kjo u vlerësua gjithsesi nga i pari i Kosovës, kur tha se “është një mesazh i fuqishëm vet vizita e parë që Josep Borell e zhvillon në Kosovë për të vazhduar tutje në rajonin e Ballkanit Perëndimor dhe kjo tregon rritjen e vëmendjes së Bashkimit Europian për Kosovën dhe Ballkanin Perëndimor”.
Nga ana tjetër, Borrell tha se për Kosovën janë shpenzuar1 miliard euro dhe se nuk ndihet në garë me amerikanët në misionin për stabilitet e pajtin në rajon.
“Amerikanët kanë shumë plane dhe kanë plane për çdo gjë. Kanë plane për Lindjen e Mesme dhe këtu është çështje tjetër të kesh plan dhe të angazhohesh që të arrish sukses. Ne kemi qenë shumë të angazhuar në Kosova dhe kemi shpenzuar më shumë se 1 miliardë euro. Por, nuk po bëj garë me amerikanët”.
Borrell vjen nga një vend që nuk e njeh Kosovën, nga Spanja, e për këtë kishte një arsyetim të tipit diplomatik.
“Përfaqësoj BE-në dhe jo shtete individuale. Këtu jam si një njeri që është përgjegjës për politikat europiane dhe të lehtësojë negociatat mes Kosovës dhe Serbisë. Problemi mund të zgjidhet vetëm nga Kosova dhe Serbia. Marrëveshja mund të vijë vetëm kur këto dy vende të pajtohen. Ne nuk imponojmë asnjë marrëveshje. Ajo që ne dëshirojmë të bëjmë është të lehtësojmë marrëveshjen”, tha njeriu i Brukselit. /tesheshi.com/
.
