Edhe presidenti Thaçi ka ecur në logjikën e kryeministrit Rama, duke mbajtur qëndrimin se nëse BE nuk tregohet bujare me Ballkanin, e posaçërisht Kosovën, kjo i çon shqiptarët drejt të jetuarit në një hapësirë të vetme. “Natyrisht, atë që e kam thënë edhe në vitin 2013 e them edhe tani, nëse Bashkimi Evropian e mbyll derën për Kosovën, të gjithë shqiptarët në rajon do të jetojnë në një hapësirë të vetme për t’u integruar pastaj tutje në familjen evropiane”, ka theksuar Thaçi.
Ai më tej është treguar mjaft kritik ndaj qasjes europiane ndaj Kosovës, ku mbizotëron mosliberalizimi i vizave.
“Natyrisht që qytetarët e Kosovës janë të frustruar me Bashkimin Evropian, me ngurtësinë e tyre, me bllokadën e tyre dhe padrejtësinë dhe ndëshkimin që po u bëhet qytetarëve të Kosovës për procesin e liberalizimit të vizave, sepse Kosova ka përmbyllur të gjitha kriteret e nevojshme dhe të domosdoshme dhe krejtësisht me të padrejtë e ka vënë edhe çështjen e Demarkacionit”, ka thënë Thaçi.
Deklarimet e kreut të shtetit të Kosovës u bënë gjatë një interviste për Radio Europa e Lirë. /tesheshi.com/
