Presidenti Hashim Thaçi ka reaguar lidhur me deklaratat e dhëna së fundmi nga Shpejtim Bulliqi, kryetar i komisionit për Demarkacionin me Malin e Zi i cili ka thënë se ka gjetur fakte se është humbur territor.
Presidenti përmes një postimi në Facebook, ka shkruar se “Zhurmëkotët e zakonshëm, të cilët për më shumë se dy vjet shkaktojnë konfuzion, jo më larg se dje, iu rikthyen zanatit të tyre. Ata përsëri arritën që me lehtësi, duke mos argumentuar asnjë pretendim amatoresk të zbuluar nga ta, të manipulojnë mediat dhe nëpërmjet tyre opinionin publik”.
Ai thotë se vendi nuk mund të mbetet peng i tekave të askujt dhe kauzave të rrejshme, të cilat sipas tij jo vetëm që mbajnë të izoluar shtetin, por rrezikojnë të prishin marrëdhëniet shtetërore me Malin e Zi.
Presidenti ndërkaq i dërgon edhe një herë mesazh kryeministrit Haradinaj të ec më tutje me procedimin e marrëveshjes në Kuvend dhe ratifikimin e saj.
“Ndërsa, në rast se institucionet tona shtetërore do të vazhdojnë të mbetën peng të trillimeve individuale apo qoftë edhe të një grupi politik të caktuar, atëherë sigurisht që pasojat për shtetin tonë mund të jenë edhe më të rënda. Prandaj, është koha që institucionet tona shtetërore të tejkalojnë këtë situatë duke u sjellë në mënyrë të përgjegjshme. Nuk mund të vazhdohet në pafundësi që individë të caktuar, shtetin ta trajtojnë si pronë private”, shkruan Thaçi. /tesheshi.com/
