Presidenti i Kosovës, Hashim Thaçi, ka konfirmuar mbështetjen e tij për punën e institucioneve të drejtësisë, njëherit ka bërë apel që të vazhdohet reforma në drejtësi, të shtohet efikasiteti i gjyqësorit sepse siç ka thënë ai prek procesin e integrimit euro-atlantik të vendit.
Thaçi këto komente i bëri gjatë një takimi që zhvilloi sot me kreun e Gjykatës Supreme, Fejzullah Hasani, kryesuesin e Këshillit Gjyqësor të Kosovës, Nehat Idrizi dhe ministrin e Drejtësisë, Hajredin Kuçi.
Presidenti Thaçi i informoi kryetarët e Këshillit Gjyqësor të Kosovës dhe të Gjykatës Supreme për iniciativën që të ndryshohet dhe të plotësohet Kodi Penal, ashtu që të eliminohen dobësitë dhe boshllëqet ligjore.
Thaçi, në këtë takim foli edhe për bartjen e kompetencave të EULEX-it tek institucionet e Kosovës.
“KGJK dhe gjykatat të dëshmojnë se janë të gatshme t’i pranojnë kompetencat dhe t’i ushtrojnë ato me përgjegjësi ndaj qytetarëve”, theksoi Thaçi gjatë këtij takimi. /tesheshi.com/
