Shefja e Politikës së Jashtme e Bashkimit Evropian, Federica Mogherini, organizoi të martën një takim mes presidentit të Kosovës, Hashim Thaçi, dhe homologut serb, Aleksander Vuçiç, të cilët po marrin pjesë në Asamblenë e Përgjithshme të OKB në New York.
Të dy presidentët kanë diskutuar mbi vazhdimin e dialogut, gjë që është bërë e ditur edhe nga Mogherini.
“Ata vazhduan diskutimet për fazën e re të dialogut midis Beogradit dhe Prishtinës, të ndërmjetësuar nga BE-ja, për normalizimin e plotë të marrëdhënieve.
Ata gjithashtu shqyrtuan përparimin e bërë në zbatimin e Marrëveshjes për Drejtësinë, e cila do të hyjë në fuqi plotësisht më 17 tetor, siç është rënë dakord në takimin e tyre të fundit”, thuhet në komunikatën e lëshuar nga Zyra e Mogherinit.
Sipas saj, Mogherini ka mirëpritur, përkushtimin e të dy presidentëve për normalizimin e marrëdhënieve Kosovë-Serbi dhe ka kujtuar se përparimi i të dy vendeve në agjendën e integrimit në BE lidhet shumë me përparimin në dialog./tesheshi.com/
